食完個叻沙米粉, 就開始整素鵝. 預備今晚攞去三號部屋Potluck.
好耐無整過呢味餸啦, 差唔多都有年幾. 上次去樹記買腐竹, 買咗幾塊腐皮, 趁今次整咗去, 唔係又會唔記得. 呢樣餸一的都唔難整, 不過比較花時間.
材料: 紅蘿蔔, 沙葛, 西芹, 鮮冬菰, 雲耳 (材料有好多選擇, 可以用翠玉瓜或青瓜代替西芹, 用馬蹄或白蘿蔔代替沙葛, 但每次我都用沙葛, 因為實在太好味)
調味: 生抽, 老抽, 糖, 麻油, 鹽, 胡椒粉
所有蔬菜類刨絲, 雲耳鮮冬菰切幼絲
兩塊腐皮, 一開四, 共八塊
用生抽, 老抽, 糖, 麻油調一個汁(要試味, 不要太鹹)
將的汁搽上腐皮
底面都搽勻
蒜頭起鑊, 將全部配料炒至八成熟, 五色蔬菜, 炒起都好靚. 記著要試味.
我用咗最簡單嘅方法, 用八隻碟將炒好的蔬菜分成八份, 而每份嘅份量都可以均勻的. 以前試過求其包, 結果到最後嗰兩條, 一係餡太多, 一係餡太少. 咁樣分開的菜, 亦可以令的菜快的cool down, 因為太熱係包唔倒嘅.
由三角位開始包起
將兩邊向左右摺入, 再捲好
八條包好啦, 放入蒸爐隻碟, 啱啱好可以放八條. 入爐蒸咗12分鍾. 如果用鑊大火蒸, 可能8分鐘都得啦.
蒸好分放兩碟
再每條cut開一件件
攪掂啦. 其實呢個素鵝, 可以蒸亦可以煎. 如果用嚟煎就唔好包咁多餡, 包到平平地, 比較容易煎. 好似塊素鴨咁(即係類似平時喺酒樓食嗰的腐皮卷囉).
得一款餸好似唔係咁好, 為免單調, 屋企又有, 再煎多樣超快嘅.
現成嘅五香素鴨
剪開個包裝, 一切為兩件
用平底鑊煎香佢
睇吓真係煎得好靚架.
再切開細細件, 咁每人都可以有一件吖
攪掂嘞! 又鵝又鴨, 鵝夠肥, 鴨就瘦的, 又蒸又煎, 係咪好豐富呢?
沒有留言:
張貼留言