Cubita - 古巴咖啡豆

2011年3月4日下午1:23公開累積瀏覽 108 0

曾經係一個咖啡迷, 每天無咖啡不歡, 有時一日飲幾杯, 唔飲就頭痛.  下定決心戒咗咖啡之後唔係完全唔飲, 久唔久好想飲, 都會飲返一杯.

星期六日, 早餐都會煲咖啡, 通常都係型爸飲, 我久唔久先飲一杯.  屋企的咖啡粉全部飲哂, 最近買返一包好喜愛嘅咖啡豆, 一定要介紹一下.

就係呢隻古巴咖啡豆.  我喜歡買咖啡豆, 自己返屋企用blender打成咖啡粉.

以前呢隻咖啡豆, 有淺煎(light roast)&深煎(dark roast).  但今次型爸去買, 已經無咗淺煎, 只有深煎賣.
以前通常買都會一次過買兩包, 一包淺煎, 一包深煎, 咁樣就可以飲到三款口味.  久唔久自己轉個combinations, 飲唔同嘅口味... 淺煎, 深煎, 淺煎+深煎.  而淺煎+深煎就係我同型爸最喜愛嘅口味.  

後來好多朋友知我喜歡飲咖啡, 去旅行有時都帶咖啡豆送比我,  慢慢品嚐, 最近全部飲哂, 我地又去買返呢隻咖啡豆. 

買咗返嚟嘅咖啡豆唔會一次過將的豆全部打成粉, 只會打少部份, 飲完再打少部份.  
未折包裝, 已隱約聞到好香嘅咖啡味, 折開包裝入密實樽, 的咖啡豆香氣撲鼻, 真係好想即時飲番杯.  但係夜晚唔敢飲, 費事瞓唔著.

今次買咗1kg大包裝, hk$280.  有小包裝230g hk$70 一包.  除咗咖啡豆, 當然有已打磨好嘅咖啡粉賣.  對於我地嚟講, 無淺煎賣有的可惜, 唔可以轉換口味, 但嗰位sales 姐姐話淺煎味較淡, 比較少人買, 所以而家無入貨.  除咖啡外, 嗰間小店仲賣雪茄, 不過呢樣唔啱我地.

晨早嘆一杯咖啡, 索吓咖啡嘅香氣, 再望吓室外嘅陽光, 真係人生一大快事...Enjoy!