雲吞皮一斤(其實太多啦, 半斤可能都夠, 但我諗著買多的, 剩低要嚟炸麻花). 今次出路遇貴人, 去到街市買雲吞皮(嗰檔老細包緊雲吞), 我話要一斤雲吞皮, 要嚟炸錦鹵雲吞, 點知幫襯緊老細買野嗰位小姐話, 錦鹵雲吞唔好用呢的皮啦, 太薄啦. 去賣豆腐檔嗰的啦. 哈哈, 點知個老闆話, 其實我呢的都得架, 阿蘇上次教整, 話我呢的雲吞皮都得架. 但係我呢個新手, 一聽到的皮薄得制, 咁包起炸起咪好易穿, 咁都係去幫襯豆腐鋪啦. 盛惠一斤hk$10.
我都係用番平時剁肉餅嘅上肉, 加好少好少好少肥肉, 平時一樣的調味(豉油豆粉糖), 亦無好似包餃子咁加的蛋白嚟撈. 醃好放入雪櫃雪一陣
新鮮海蝦一斤, 剝殼, 用少許鹽同胡椒粉調味, 放入雪櫃雪一陣, 我無將的蝦同豬肉撈埋
所有配料預備好就開始包啦, 呀! 仲要預備的水, 用嚟將雲吞皮黏合, 有的人用蛋黃, 但用嚟炸會唔會好易燶呢, 都係用水穩陣的.
先包一兩隻, 諗著炸嚟試味, 加少量豬肉, 半隻蝦. (的蝦太大隻, 落一隻攪唔掂, 包唔哂)
第一隻落得太多餡, 炸雲吞唔需要咁多餡, 第二隻就包少的餡..... 跟著就繼續包.... 包咗成50隻呀!
用個細煲嚟炸, 的油滾咗就調番中細火, 一次唔可以落太多, 只可以兩至三隻
深色嗰幾隻係炸嚟試, 一次過炸耐的, 唔翻炸. 其他嗰的淺色的就預備炸兩次.... 炸咗一半就叫Ruby幫手炸, 我要去整汁啦
錦鹵汁配料有, 豬潤, 蝦, 鮮魷(先炒至七八成熟, 盛起備用), 洋蔥, 青椒, 紅蔥頭略炒至半軟. 細菠蘿一礶, 切丁, 菠蘿水可用嚟調味
今次又攪攪鬼, 用山楂嚟做醬汁, 用咗兩筒山楂餅, 用熱水匙羹整溶, 再過濾一下. 都見過有的食譜用山楂, 仲要加的紅菜頭嚟煮, 我唔想攪咁多啦
將山楂水落鑊煮滾, 加調味, 唔夠色可加茄汁, 太酸加糖, 唔夠酸加白醋. 調到一個啱自己口味,
加埋所有配料煮滾, 加生粉水埋茨
咁就攪掂啦...
仲有的炸了兩次嘅雲吞... 呢碟係第一輪, 到我地炸好第二輪, 第一輪嗰的已經無哂, 影唔到張大合照添
反應好好呀! 四十幾隻, 好快就已經無哂, 我只係食咗兩隻(都係佢地見我仲忙緊整兩面黃, 唔好意思, 留番比我咋)只剩番的汁.... 不過我仲有雲吞皮, 好以再包....
沒有留言:
張貼留言