February 26, 2012, Sunday in Bangkok
今日又係好輕鬆呀! 又係九點幾先落餐廳食早餐. 嘻嘻, 不過我都係食番咁上下野.
今日無石榴汁, 倒咗少少柑汁飲吓, 不過唔係幾like
唔like的果汁, 索性叫壺紅茶啦.
今日又係好輕鬆呀! 又係九點幾先落餐廳食早餐. 嘻嘻, 不過我都係食番咁上下野.
今日無石榴汁, 倒咗少少柑汁飲吓, 不過唔係幾like
唔like的果汁, 索性叫壺紅茶啦.
今日又要咗半碗粥, 今日係肉丸粥. 無咁"好味"路喎, 正常的.
又攞咗的沙律, 芝士, Yogurt, 仲要的烘得乾的嘅煙肉, 無咁肥
又嚟半生熟蛋, 不過今日攪攪野, 加的芝士落去. 將的芝士切粒粒
掀起蛋蓋, 加的胡椒鹽, 加一粒軟芝士同的蛋一齊食, 好正呀!
食完嘅節目, 又係去泳池曬太陽游水呀!
今日無帳篷椅, 比人預先放個袋霸咗, 不過呢兩張對著泳池嘅都唔錯. 型爸鍾意曬太陽, 收起隔離嘅太陽傘, 咁曬到佢就曬唔到我啦. 今日都游咗十個堂, 有的攰呀! 响泳池hea咗兩個鐘, 返房沖涼洗頭又要出去啦.
成一點幾先出發, 今日我地要去翟道翟呀!
去翟道翟, 第一時間唔係去買野, 而係去醫肚. 搵嗰檔(又係响胡慧沖個網頁搵嘅, 既然去翟道翟, 梗係去試吓啦), 去食大蝦炒粉呀! 跟著個地址, 好快又比我地搵到路喎. 我地兩個人, 叫咗碟300baht for two.
跟著叫咗杯飲野, 嘩! 檸檬茶, 咁大杯嘅. 型爸叫啤酒. 當我杯檸茶同啤酒放埋一齊就知道好大杯啦.
碟大蝦炒粉嚟啦. 不過有的失望, 的蝦都唔係好大啫, 仲只係得3 隻. 唔通300baht3隻, 500baht5隻. 佢地用的生芽菜同韮菜嚟拌碟. 不過的粉炒得好甜, 唔係咁啱口胃, 其中一隻蝦仲霉霉地, 我地同佢講, 要佢換過一隻, 佢地又肯喎. 不過講真, 好彩我地叫一樣試吓啫, 真係麻麻. 下次都未必嚟.
行吓行吓, 真係又熱又攰. 好彩我帶哂雨傘遮大觴, 都唔係好得, 結果先去行內街. 行得太攰, 又去幫襯第二間
呢間又係有的卓頭, 將兩個鋪位, 加咗帳篷, 放的音樂, 成間小餐廳咁. 型爸又叫咗啤酒, 我就叫杯青檸梳打
坐喺到無咩野做, 展示吓其中一樣戰利品, 就係呢兩對拖鞋. 我同型爸每人買咗一對, 仲即買即著.
跟著又再行, 都係不停流汗, 化咩野裝都無用. 但真係奇怪, 嗰的泰國人, 一的汗都無嘅.
嘩, 好大粒炸魚蛋, 忍唔著, 一定要買嚟食. 大中細, 就要30baht嗰種啦.
就係咁用個膠袋袋著, 加咗的辣汁一路行一路食, 好味喎. 不過的汁估唔到好辣喎...要買野飲
跟著又見到魚蛋粉檔, 不如坐低食啦, 仲叫咗杯菊花茶, 清涼味架. 呢碗粉都只係30baht一碗, 仲平過喺曼谷市食. 响呢的遊客區都賣咁平, 真係有良心檔口. 下次一定幫襯.
實在太攰啦, 又攞著好多戰利品. 見到呢檔按摩, 咁多年都唔肯幫襯, 今年無辦法, 都係要幫襯一吓. 仲有排先至去食飯, 都係屈就的按吓. 點解唔鍾意, 因為覺得唔衛生, 張櫈無墊毛巾, 個個身水身汗都係咁坐, 的毛巾又好似無換.... 試吓就試吓啦. 一個鐘按腳同按肩, 不過的手勢就真係麻麻.
按完差唔多天黑, 有好多檔口開始收檔, 但係又有好多小檔開檔. 的小檔開响的大檔前面. 結果夜市開始一樣咁熱鬧...不過我地唔行啦, 都係搵架的士去食飯啦.
不過又比咗我知道, 下次唔好咁早嚟, 又曬又熱, 都幾難頂, 最好3-4 點先嚟, 等的太陽收咁的, 無咁熱咁辛苦.
沒有留言:
張貼留言