五號屋的部落: 延遲了的泰國之旅 - Day 3 - 2- 去到無得食嘅Tuscany, 可能係最好食嘅煎蠔蛋, Asia Herb按摩

2012年3月4日星期日

延遲了的泰國之旅 - Day 3 - 2- 去到無得食嘅Tuscany, 可能係最好食嘅煎蠔蛋, Asia Herb按摩

2012年3月4日下午12:04公開累積瀏覽 2708 1

February 26, 2012, Sunday in Bangkok

六點鐘, 我地由翟道翟截的士諗著去一間大約十分鍾車程嘅餐廳. 但係截咗幾架的士, 佢地都唔識去, 我地又唔識泰文. 最後無辦法, 試吓坐tuk tuk啦, 截咗第二架, 嗰位後生仔話識, 但開價100baht, 我還價80baht佢即刻ok, 型爸話我應該還價50baht, 唉吔笨咗的, 算啦. 不過都比呢個後生仔嚇死, 佢開得超快, 我地坐喺後面要捉到好實, 如果唔係容咩易比佢飛唨咗我地出去.

呢, 就係佢啦, 落車叫佢唔好走著, 影張相先, 佢又制喎.

不過.....我地即時就嘗到唔做booking嘅結果啦.....

呢間Tuscany又係响Thailandfans 嘅網頁搵嘅, 諗著咁近翟道翟, 行完嚟食飯咪啱啱好....點知.....

呢間餐廳今日比人包咗埸舉行婚禮呀!....唉! 都係無預備, 應該今早出嚟前叫hotel幫我地打電話book, 咁就唔會白行一趟.

食唔到, 都影幾張相, 呢道地方好大, 但每層都鬆上唔同嘅顏色, 幾靚架. 唯有下次先再嚟啦. 不過唔止我地摸門丁, 有好幾架車(應該係本地人), 佢地嚟到都要走無得食.

間餐廳幫我地截的士, 係呢道好偏僻, 好耐先有一部車, 但係竟然話唔去咁遠, 拒載. (我地今晚book咗Asia Herbs Assocations, 响Thong Lo). 到有第二架的士, 又係咁, 我地即時話去Mo Chit BTS, 佢先載我地咋. 咁我地咪轉BTS 去Thong Lo.

一咁攪法應該唔夠時間去食飯, 型爸話不如我地去食炒蠔蛋啦. 咦! 又好喎.

呢間鋪仔喺Sukhumvit Soi 55, Asia Herb Association 對面, 食完行過去就得. 胡慧沖話呢道可能係最好食嘅煎蠔蛋, 好多本地人都揸車嚟食. 我地嚟到差唔多八點, 又唔係好多人喎. 不過鋪仔有冷氣, 唔使坐街邊, 都幾好吖.

即叫即炒, 我地叫咗一份蠔仔煎蛋, 一份海鮮煎蛋

嚟啦嚟啦, 海鮮煎蛋, 蠔仔煎蛋

可以落呢的調味, 但係我覺得本身都幾好味, 唔需要落呢的. 天氣太熱, 都係要飲凍野, 我要雪碧, 型爸要可樂.

我同型爸share嚟食, 又真係唔錯喎. 不過一陣間要按摩唔好食咁飽啦. 每份好似120baht, 都算抵食.

食完仲有的時間, 行咗去前少少嗰間好出名專賣芒果糯米飯嘅店(又係話可能係最好食嘅芒果糯米飯). 睇吓成個鋪面都係芒果

側面另外仲有賣一的硬殼果(唔知叫咩), 同埋柑. 呢道好似無橙賣, 成日都係賣柑. 柱上面寫哂價錢, 但係全部泰文唔識睇. 當其時好多人幫襯, 全部都係講泰文, 呢檔可能喺本地人心目中都應該係幾好. 但我地要去按摩, 唔買啦, 又唔食得糯米, 買咩野芒果糯米飯吖.

八點半, 我地訂咗九點, 早的去都好, 可以先沖涼休息一吓. 時間啱啱好.

Asia Herb的環境真係唔錯架. 大堂接待處都好靚

呢道係接待處休息室. 佢地有幾國語言嘅價目表, 中英韓日.

但呢道價錢唔算貴, 型爸揀香薰按摩, 兩小時1,100baht, 我都係鍾意泰式按摩, 兩小時650baht

上到三樓都仲有休息嘅地方. 入到去按排咗雙人房, 我地可以先沖涼. 行到身水身汗, 梗係沖個涼啦. 不過無熱水, 要沖凍水...咁熱, 都頂得著.

唔知係咪先入為主, 今日幫我按嘅師傅真係麻麻, 好多地方都唔到位, 都係第一晚响Thongnoppakhun响個師傅好的. 不過我相信每處按摩地方都會有好師傅, 亦都會有的差的, 睇吓遇到邊個啫.

按完我地坐BTS三個站就返到Nana啦.