燻蹄

September 30, 2017, Saturday

呢幾日工作忙得不可開交, 不停開會開會開會, 十幾個鐘真係人都顛.  返到屋企都攰到死.

八號屋女主人早幾日約今天聚餐, 我都無時間諗整咩, 今日休息, 摷吓雪櫃有鹹豬手, 咁就整燻蹄啦, 用嚟送酒或做餸都啱.

呢兩隻豬手在梁九記買的, 價錢比超市平, 都幾大隻架.   呢款豬手, 的皮較為深色.

通常一次都整兩隻, 慳水慳力呀!

煮好一鍋白滷水, 入面有花椒八角香葉甘草薑片(加鹽加魚露及冰糖)

跟著放入萬能煲炆

炆好趁熱起骨.  再切開尖頭倒腳的包扎起來

包好就係咁啦.   跟著就用冰降溫

起碼要四小時候先可以切.   雪得夠實切就比較容易

整咗咁多次, 覺得要切得越薄越好 (嘻嘻, 咁就要拎把玫瑰刀出嚟幫幫手)

切好再切一半, 食的時候就一啖一塊.

至於醬汁, 用蒜蓉, 辣椒, 醋, 水, 調到啱自己口味就得啦.