稻坊皇席宴慶母親節

2011年5月12日下午3:26公開累積瀏覽 22 1

May 9, 2011, Monday night

我地今日約齊人, 同奶奶慶祝母親節.  故意揀今天, 因為唔係正日, 無咁多人, 再加上明天係佛誕假期, 唔使返工, 真係very good啦.

姑奶同二伯嗰日嚟飲茶, 已經選定呢個套餐, 淨係星期一至四供應, 今日係星期一, 啱啱好. 

HK$1,488一席茶芥全包, 仲有兩支大啤加六礶汽水.  半席都係HK$788.   如果星期五就要HK$2,188...
雖然係星期一, 見佢地都好好生意, 好似全埸都滿座.....唔通好多人都係同我地一樣諗法?

我地連大夾細18人, 訂咗一席半.

金豬大紅袍

碧綠蚌片爆花姿, 碟餸擺得幾靚啵, 唔知似朵花定係個心形呢?

脆香石榴球, 呢碟無論賣相或味道都好好. 每一個石榴球都係用粉絲扎著再炸, 炸得好夠鬆脆.(睇得出花過功夫)

紅燒花膠雞絲翅, 呢個係全晚最差嗰樣, 直程係漿糊咁, 非常唔得, 個茨打得太重啦.  我地唔係要食咩野靚翅, 不過真係稠到打側個碗差的唔識流出嚟.

蠔皇花菇扣玉掌, 呢碟好味, 賣相都好靚

魚腐濃湯泡菜皇, 呢碟碟頭較細, 的菜少咗的

本來係清蒸雙囍斑, 唔知點解變咗多寶魚嘅.  唔知係咪海斑賣哂!  咁係咪兩款魚都差唔多價錢呀!  還好, 兩條多寶都好滑.

飄香荷葉飯, 哈哈! 呢碟飯有色但無味, 應該叫豉油皇撈飯.  食唔哂啦.

甜品係奶皇果仁水晶包...呢碟唔甜, 但食落無奶皇嘅香味, 都算ok啦

呢隻雞就真係離哂諳啦, 我地催咗好多次, 半席嗰檯就嚟咗(細煲半隻雞), 但係我地全席呢圍, 等到食完甜品生果都未嚟... 最終嚟咗啦, 個煲熱, 但係的雞係凍嘅.  不過我地已經好飽, 都無叫佢翻熱, 淨係叫佢比兩個盒我地打包.  點知夾起的雞, 原本煲底應該有的金針雲耳墊著隻雞, 但係都無.   唔知係廚師做到傻咗定係咩都賣哂呢?   不過算數啦, 我地都食完嘞. 

睇吓! 隻雞highlight哂叫做黃金御品雞... 仲話先炸後扣, 皮香肉嫩, 黃金外衣, 精選配料, 令人著迷的御品美味...  超誇張...我地無法認同.

埋單時, 姑奶仲攞咗張優惠coupon出嚟...

可以減二佰蚊呀
嘩! 超抵呀! 埋單hk$1,488 + hk$788 - hk$200 = hk$2,076...

雖然有個別餸唔係咁理想, 但大部份嘅餸都ok呀!  咁嘅價錢, 想點呀!  我地18個人, 有三個小朋友(就算三個當一個計), 人均都係hk$130... 好抵呀!  真係生意難做呀!   還好見佢地幾好生意, 九點半後仲好多人打邊爐添.