香妃雞

2011年5月5日下午3:54公開累積瀏覽 209 2

April 30, 2011, Saturday Night

 

過年嗰時睇報紙, 見到史雲生介紹整呢隻香妃雞, 覺得好似好容易整, 已經好想試吓, 但一直都無再醒起.  今日Ruby咩都未煮, 我打開個廚櫃, 見到盒史雲生清雞湯, 咁啱又買咗隻雞返嚟,  突然醒起呢個recipe, 即刻攞返出嚟, 咁就試整吓呢款香妃雞.

報紙寫嘅做法都好容易, 只不過係用史雲生雞湯煲滾, 然後用嚟浸熟隻雞, (我影極都無法將的字影得清晰的,我呢部傻瓜機係咁上下啦)

睇真的個recipe, 吓! 要兩公升雞湯...我得一盒一公升咋喎, 史雲生你都真係好hard sell 喎, 咁樣用兩大盒雞湯咪已經二十幾蚊..., 不過我笨我都係要整....
原recipe話先用鹽搽勻全隻雞, 醃30分鐘.   兩公升清雞湯煲滾, 落雞加蓋至再煲滾, 熄火焗30分鐘....  但我只得一公升雞湯, 咁都照整囉.

的湯只夠浸半隻雞, 我將隻雞每邊煮5分鍾, 同時將的雞湯淋上面.  最敝係唔記得將兩隻雞腳撐入雞肚內, 攪到好難轉身, 用隻筷子一拮, 攪到的雞皮都爛埋...  左邊, 右邊, 雞胸, 雞背, 各煮5分鐘, 跟著加蓋, 大滾熄火焗20分鐘, 應該ok路啩...

攪掂啦, 碟雞係Ruby斬架... 我失敗啦, 兩隻雞髀都唔熟呀!  不過Ruby斬雞時好似見唔倒咁, 照斬又唔出聲, 到我發現, 的雞湯已經凍哂.....唉.... 唯有夾起嗰幾嚿生嘅用微波爐叮熟佢啦.

諗諗吓我都算stupid, 應該將隻雞斬開嚟浸, 一公升雞湯都應該可以嘅...

話時話, 隻雞用清雞湯浸完的味道同普通蒸雞係無咩分別嘅.  知先整白斬雞, 或者手撕雞咪仲快靚正, 使咩攪咁多野喎......   再加埋二公子嗰句, 做咩唔整手撕雞呀...(佢唔鐘意食咁多骨架)... 唉!