金華火腿

2011年5月8日下午1:30公開累積瀏覽 199 0

我今日又有特別介紹, 係三家姊姊夫從杭州帶回來嘅金華火腿呀!

五哥之前去過杭州買過的金華火腿返嚟, 食過幾隻話幾好.  見到家姊今次去杭州, 叫家姊幫手買隻返嚟, 我梗係唔執輸啦, 叫家姊帶多一隻啦.

 

不過家姊姊夫就辛苦啦, 第一日就去杭州, 第一日買咗, 拎到第五日返香港.  不過唔係跟領隊去旅行團嘅地方買, 佢係經過一間好大嘅店舖, 入面有個專賣火腿嘅專櫃, 就响嗰道買嘅. 佢話個package大太, 塞唔到入個喼呀! 真係辛苦哂.

就係呢隻啦!

比個close up

金字火腿...香傳一千年, 有無咁誇呀

金字牌嘅金華火腿.  個包裝成個球拍袋咁.  拉開拉鍊, 火腿有皮嗰面係咁嘅.  响皮上面打印咗金字火腿股份有限公司

無皮另一面係咁嘅, 不過最尾個段同隻豬腳仔好似唔match喎

家姊話個旅行團領隊話成隻火腿最正應該係第三嚿, 咁我拎第三第四嚿出嚟睇吓, 都係差唔多啫...
仲有一份包裝說明書, 介紹呢間金字火腿股份有限公司2010年12月响深交所A股上市.

而內頁就介紹火腿儲存方法

介紹成隻火腿可分為, 火爪, 火踵, 上方, 中方和滴油, 有介紹烹調方法, 但睇完都係唔明呀!

等我研究吓邊嚿係邊個部位先....咦! 有的唔妥喎...睇真的點解第三同第四節嘅骨唔連接唔到嘅? 第一至第三嚿的骨位連接, 而第四至第六嚿骨位又係連接嘅.   但第三, 第四唔連接, 即係有幾個可能性... 1) 頭三嚿同後三嚿唔係同一隻火腿; 2) 第三第四嚿之間少咗一段; 3) 佢地大批一齊包裝, 包裝工人隨便執到咁上下就算, 夾埋一隻就算.

呢, 就係咁啦...會唔會無咗中間嗰嚿呢?

家姊... 我地係咪中咗招比人搵笨呀!... 即刻打電話比五哥睇吓佢嗰隻點樣先....佢話佢嗰隻都係咁, 不過佢地係第一二嚿唔連接, 第三至六嚿係連接嘅.  連埋隻豬腳仔又係七嚿. 

打電話問家姊, 佢話買嗰時個package用索帶扣著拉鍊位, 唔可以拆開嚟睇, 只可响package外揀嚟買. 佢已經揀咗好幾pack...只可以睇到的色, 其他睇唔真.

哈哈哈哈! 唔知邊個可能性大的呢?  安慰自己嘅梗係揀第三啦.  係佢地求其放入去包裝, 無少到.  不過如果就算係無咗中間嗰嚿正野, 都仲有咁大隻火腿, 都有排食啦.  至於質量如何, 就要拆開煮過先知啦. 

如果真係比人搵笨, 都係大圍事, 國內的鋪頭就搵我地的港人笨, 的國內同胞嚟到香港又比某些珠寶店搵笨.....其實我地去其他東南亞地方旅行買野又咪咁....總知唔小心, 睇少一眼都唔得.  呢個世界點解咁嘅呢...

上次買嗰隻西班牙火腿, 啱啱先差唔多食完, 而家又有一隻中國嘅金華火腿.  又要上網睇吓呢隻火腿可以點樣攪作...