今日係秘書節, 約咗平時幫我手嘅兩位同事一齊出去食飯. 去咗日航酒店桃李中菜廳食午飯. 嚟過好幾次, 但每次人客都唔多, 如果想傾吓謁, 呢道都算靜, 仲有海景添. 不過有時陽光太猛, 瞪著隻眼反而唔舒服.
睇完餐牌都費事諗, 都係叫商務午餐. 個商務午餐for 2 位, 我叫佢加到3位, 價錢都係照加上去.
我同另一位同事揀咗老火例湯, 味道都唔錯
另一位同事揀咗鮮蝦蟹肉冬蓉羹, 睇落都好靚, 同事話味道都ok
我地三個都揀咗點心拼盤, 伙計話無得揀點心, 由廚房出. 如果知道係呢三樣, 我諗我寧願揀燒味拼盤. 講返轉頭, 的蝦餃係做得好好, 皮薄, 入面的蝦夠爽, 係幾好嘅.
呢個燒賣都唔差, 只不過我自己本身唔鍾意食燒賣
春卷我無食到, 同事話都唔錯, 幾脆, 入面都係以蝦為主做餡. 因為我地三個人, 所以每款點心都係三件.
小菜方面, 我地每人揀一樣, 同事揀咗香芹銀蘿煮三文魚頭腩, 味道ok
另一位同事揀咗菠蘿咕嚕肉, 的肉夠瘦, 但咁啱我食嗰嚿比較韌. 呢碟我喜歡食的配菜多過的肉, 味道都唔錯.
我就揀咗美極香煎龍利柳, 都ok
我地要辣椒醬, 嗰位伙計就拎咗呢碟辣嘅XO醬叫我地試吓. ok嘅, 不過蘇太XO醬好味的.
睇吓幾豐富
另外仲揀咗蝦籽豉油皇炒麵, 麵身都好夠爽, 加的xo醬落去食都幾好味.
甜品方面...
同事揀咗紅豆沙
另一位揀咗豆腐花
而我就揀咗涼粉
呢餐都唔平, 我有coupon, 可以慳番的.
其實呢道嘅食物質素唔錯, 煮得都幾好, 但一的特式都無, 全部都係大路野, 普通酒樓都有, 不過平好多. 食完係唔會覺得差, 但係又唔會好想再嚟, 因為完全無一樣餸係令人一諗起就想返嚟食. 真係好久唔久先會嚟幫襯一次.
呢道可以話適合的外國遊客, 嚟到就係要食呢的大路野, 如果唔係酒店嘅中餐廳, 點頂得著.
沒有留言:
張貼留言