2011年5月13日下午2:26公開累積瀏覽 104
昨晚同奶奶食飯慶祝母親節, 奶奶同我講明天"萬佛誕", 一齊去食齋好唔好.... 諗吓諗吓, 都真係好耐無同奶奶去食齋(以前久唔久都會同佢去吓的佛寺食吓齋). 奶奶出到聲, 梗係話好啦!(其
實我一早已經book咗早上去做針灸) 時間趕的, 應該都無問題嘅.
我提議試吓大自然素食, 上次同型爸食過一次, 有新鮮感, 想同佢地試吓.
Book咗尖沙咀美麗華嗰間, 12:30, 姑奶佢地去攞檯, 遲咗10分鐘, 竟然賣咗張檯. 咁我姑奶見佢有兩張大檯未有人坐, 同佢講搭檯都唔緊要, 點知嗰位小姐唔理佢, 唔出聲行咗去. 結果要多等十幾二十分鐘. 姑奶話佢地的服務態度唔好, 好似生意好, 唔優做咁款(當其時不在場, 唔知實際情況).
我同型爸大約12:50到, 見仲未有檯, 就影吓相, 呢道全部都係新派素菜
陳列櫃有好幾款陳列品菜色
我覺得呢碗魚生最似. 影咗一陣就有位嘞
我地都唔知叫咩野好, 6個人, 就揀咗個6人套餐
揀咗呢幾樣菜式, 落單時我提醒嗰位小姐, 我奶奶今日食齋, 唔可以食蛋或奶類, 所以好幾樣餸都要走蛋.
呢兩款前菜係送嘅
瑤桂四季燴翅
入面主要係金菇雲耳, 不過又係煮得好糊(咁又無昨晚响稻坊食嗰"翅"咁稠)
芝麻手撕雞, 呢碟只不過係手撕麵筋, 味道都ok, 但係上碟真係好難睇, 呢碟係完全未夾過, 上碟已經係得半碟. 的麵筋唔係咁矜貴啫, 使唔使咁慳皮呀! 如果真係要細碟的, 不如換隻細碟啦.
燒汁雜菌牛仔肉, 的牛肉應該係用素雞代替. 呢碟煮得好惹味, 不過頗肥膩
紅燒海皇豆腐煲, 呢碟都ok
上湯銀魚浸菜苗, 亦都係將的豆乾/腐皮炸咗再用嚟煮菜, 都ok嘅
松子糖醋鴨, 呢碟煮得幾好味, 但碟頭真係好細, 每人得一件, 一件素鴨都只不過係幾蚊雞, 呢碟餸只得半條素鴨, 真係使唔使咁慳皮呀!
鹹魚雞粒炒飯, 當然入面無魚也無雞啦!
豉油皇什菌炒河, 味道ok, 略為肥膩
其實我地都叫咗好多野, 亦包咗一炒飯一河粉, 6個人6人餐, 都只係緊緊夠食, 因為有兩三碟碟頭都好細.
個午市套餐都唔平, hk$548, 但原來最貴係茶錢hk$12一位...真係好貴喎. 另外當然仲要加一小費啦, 個餐hk$548, 但茶芥加一之後就要hk$682...
埋單嗰時真係有的唔開心, 嗰位小姐問我地有無優惠咭, 我地問咩野優惠咭呀! 佢話有優惠咭可以有九五折, 咁我問點樣可以攞優惠咭呀? 佢話一陣話比我地知, 跟著去埋單. 埋單時佢當然無比折扣啦.
我地出到門口...咦, 係喎, 唔記得問佢地點樣攞張優惠咭喎, 咁問返嗰位小姐啦. 點知佢指一指門口迎客櫃檯上裝著咭片嗰個盒仔, 然後話攞著呢張咭片就有九五折....吓! 唔係阿麻, 呢張咭片我地有喎, 仲係係人隨手攞都有. 之前我問佢張優惠咭係點佢又唔答, 如果佢比我地睇, 我地就知啦, 分明係唔想比我地張單打折.
就係呢張咭啦
後面係分店地址, 如果無認真睇, 係唔會留意左上角寫著憑咭可以有九五折.
我同嗰位小姐講, 你有無攪錯, 識唔識做生意(就算我地無咭都應該即時比一張的客, 等的客開心的啦, 點知佢仲攞都唔攞比我地睇就埋單)... 佢木無表情唔出聲.
其實九五折只不過係三十蚊, 但係嗰位小姐嘅態度, 令我地唔想再嚟呢道幫襯囉.
我奶奶今天係全天吃齋, 但我諗佢應該鍾意食舊式齋多的, 即係响佛寺食清淡的簡單的嗰的. 一年某幾天特別日子奶奶都會全日食齋, 但齋係一定唔可以有蛋或奶類食品. 所以齋菜同素菜係有分別嘅. 今日呢種新派素菜, 奶奶可能未必鍾意.
應承咗下次同佢去第二間食, 平時唔去飲茶, 去食齋都得啫.
沒有留言:
張貼留言