臘腸雞卷

2011年11月30日下午11:17公開累積瀏覽 297 1

November 27, 2011, Sunday

昨天輕輕鬆鬆, 今日又要開工,

今晚我地又有potluck, 不過唔係响五號屋.  八號部屋話唔好成日打攪我, 佢最近換咗個菲傭姐姐, 呢個姐姐好幫得手又cheerful, 今晚就喺佢屋企攪啦.

並實我又真係無咩所謂喎, 不過大家周圍去吓又高興的啫.

今日唔使做host, 多的時間, 就可以整的手工多的嘅野.

之前整過鳳眼卷, 今日整臘腸雞卷.  一向都覺得臘腸同雞都好夾 (臘腸冬菰滑雞煲仔飯, 正呀!)


今日主角, 雞扒3件, 鴻星臘腸及潤腸

一件雞扒包一條臘腸, 我用咗兩條潤腸一條臘腸

首先將雞扒鋪平, 將比較厚身嘅肉起出嚟, 等的雞肉分佈可以平均的, 咁樣容易的包又靚的,  將條臘腸放入試捲, 啱啱夠一圈就可以, 而剩低嘅肉可以切出嚟, 的雞皮唔好切走, 要用嚟收口. 再用刀背將雞扒略為剁平.  跟著落鹽及胡椒粉調味(調味隨個人喜好, 但臘腸有鹹味, 所以我覺得無需落太多醬料),


切出嚟嘅肉可以留番嚟炒雞丁, 我用咗三塊雞扒, 但切出嚟嘅肉都有一塊雞扒咁多

跟著就可以包啦, 捲好之後, 就用牙籤連雞皮拮好 (呢個時候, 的雞皮就發揮好大嘅作用)


睇吓, 都包得算幾均勻, 可以蒸啦

大火加蓋蒸大約20分鐘, 蒸起好多油架

唔要的油, 將牙籤慢慢取走, 蒸熟後雞捲已經定型, 唔會散開.   其實呢個時候都可以切嚟食, 但我覺得做多一個步驟好的

就係用平底鑊再煎一煎, 將雞皮的油再迫出嚟, 我唔想去皮直接煎的雞肉, 咁樣的雞肉會好嚡.


煎咗的雞皮會好脆, 無咩油.


切好就上碟可以啦.

食嘅時候, 可以唔要的雞皮(我一定去皮), 的雞肉好滑加埋的臘腸, 好味呀!  雖然我勸佢地唔好食雞皮,  但我見的男士, 個個都好似聽唔到咁....

煮呢個餸, 我覺得的雞皮真係發揮了好大嘅作用, 可以好似保鮮紙咁包實的雞同臘腸, 又可用嚟收口(淨係拮的皮唔拮肉), 煎起上碟又靚的添呢.