泰.皇悅

2012年6月16日下午2:51公開累積瀏覽 380 2

Jun 14, 2012, Thursday Night

今日型爸帶咗Loki去Pet shop沖涼剪毛, Loki超唔願意, 一去到門口就走.  要夾硬捉佢入去.  唉,  响pet shop要入籠, 佢邊習慣吖, 佢困咗一日, 又唔肯响籠入面小便.  結果由早忍到晚, 到型爸五點幾帶佢走,  一行到出街即刻小便, 攪到型爸幾唔意思, 又無攞定水樽沖水.   返到屋企, Loki仲係超唔開心, 型爸叫佢都唔睬, 我地返到屋企佢有的反應開心少少,  但好明顯佢係好唔開心, 同平時唔一樣囉.  諗起佢忍咗一日又困咗半日, 個心有的痛添...   星期六仲要帶佢去獸醫道驗血, 唔知佢點呢.

等Ruby返到嚟, 我地先出去食飯, 唔想Loki獨留在家中呀!

Ruby好興奮, 一返到嚟巴巴巴....佢話今日同的friend 去咗大佛, 行咗幾百級石梯, 好攰喎.  希望佢放假開心, 返到嚟做野都開心的.

 

都無咩Idea食咩, 開車去到上水, 見到有一間泰菜, 未食過喎, 响門口望入去, 咁啱有一張四人卡位, 咁就入呢間食啦.


比咗兩本menu, 封面係自家彩色打印,  多款菜式嘅相片.

型爸先嚟一枝Singha, 但我同大公子二公子都唔要野飲

 

二公子叫嘅泰式燒豬頸肉....不過味道麻麻, 五號屋整嗰的好味的


細冬陰公湯, 味道都唔錯, 都夠四個人, 每人一飯碗


一睇就知唔得嘅雞肉鬆生菜包, 的雞肉嚡到....的雞肉似係用的急凍雞胸肉剁成, 又無醬汁, 味道唔好.


咖哩大蝦配蒜蓉包.  的汁都算ok, 但係的大蝦就真係唔得, 只有兩隻大頭蝦, 開邊, 炸到的肉硬哂, 的蒜蓉包又焗得唔脆...呢碟hk$208, 真係唔抵食.


炸蝦餅, 普普通通都ok嘅.


碟生蝦刺身最後先嚟, 唔好睇的汁綠色, 勁辣.  味道一般啦.

大公子一啖食落去, 辣到佢出哂汗同眼淚, 我即時叫位侍應小姐攞包糖, 點知佢話無, 又無攪錯, 飲咖啡奶茶都有啦, 但佢有糖但係無一包, 但又唔去攞,  唉, 都費事同佢講, 馬上叫佢整杯珍多冰.


飲咗杯珍多冰, 大公子先話好的, 佢話剛才辣到耳仔都痛埋.

食哂的野, 兩位公子都唔係好飽咋, 但的野唔得, 唔想再叫,  二公子話返屋企叫Ruby煮黑蒜油公仔麵, 我話吓, 唔係阿麻....

咁埋單啦...

 

hk$557, 真係一的都唔平, 還好唔使加一.  不過我諗我地都應該唔會再嚟.

食咗的辣野, 不如去食龜苓膏清吓熱, 當甜品啦.  大家一致贊成...


大家食得好開心呀!  佢地話飽哂啦....

食呢盅龜苓膏, 我地仲開心過食頭先嗰餐泰菜.