今朝早上, 帶Loki去睇醫生, 叫埋大公子一齊去, 點知大公子一起身發覺下嘴唇腫咗, 完全唔知點解, 亦都唔知對咩野敏感. 咁打電話去家庭醫生booking, 要十二點幾先有得睇, 咁一齊帶Loki出去睇醫生先再同大公子睇醫生.
我地同Loik book咗去Acorn
响西營盤第二街. 要去到咁遠因為未收養Loki之前, 佢一路响呢道留醫, 直至病好. 呢道的醫生姑娘, 全部都認得Loki, 有哂佢以前嘅病歷.
上次同佢嚟, 已經係5-6月前, 醫生叫佢幾個月後返嚟覆診, 要驗血睇之前佢腎衰竭醫番好之後有無後遺症, 有無對腎臟做成永久傷害. 去到Loki初時唔肯入去, 入到去都好緊張呀, 醫生叫我地抱佢上張診症檯, Loki驚到震哂. 醫生要响佢下顎近頸位置剃咗的毛, 先可以幫佢抽血.
我地發覺Loki時常抓右耳, 醫生一睇原來右耳發炎. 叫醫生幫佢check吓腰同腿, 無咩大問題. 但我地話好明顯當我地掂佢後腰位置, 佢馬上閃開, 醫生話可能係的肌肉扭親, 休息吓應該無問題. 我地話Loki呢兩日好down, 唔肯食野, 醫生幫佢探熱, 原來佢有的發燒同氣喘.
等咗二十分鍾, 驗血報告出咗, 慶幸佢嘅腎臟回復正常, 但發現佢血小板偏低, 有兩項唔知咩野抗體偏高. 醫生話呢個悄況, 佢有可能係牛痺熱, 所以有的發燒同喘條. 有兩個option, 馬上當係牛痺熱, 食菌一個月. 另一個係再抽血去化驗, 睇吓係咩野結果再對正落藥. 抽血之後, 再要驗小便. 下星期先有報告. 响呢段時間, 都要食抗生素, 下星期報告出咗, 到時會打電話通知我地結果.
結果今日張單, 梗係好犀利啦, 盛惠hk$4890. 淨係三項lab test, 已經hk$3,800. 但係無得肉赤, 一定要檢驗清楚. 費事擔心.
消炎藥, 滴耳藥同杜蟲藥.
攪掂完Loki, 輪到載大公子去睇醫生, 我地打電話去延遲一個鐘先趕得切, 還好見到大公子未睇醫生個"朱唇"已經開始退.
雨好大, 頻頻撲撲, 真係頭都痛埋, 帶著Loki又唔可以喺出邊食晏. 唯有等大公子睇完醫生, 去麥記買幾個包醫肚. Loki真係好唔舒服, 我地响架車食包, 都好香架, 平時佢好為食加麻, 今日聞都唔聞, 淨係坐喺到. 我地都係快快返屋企.
返到屋企已經三點幾, 唔知係咪淋咗雨, 架車冷氣又凍, 頭好痛又覺得凍, 即刻上床瞓瞓先.
瞓咗個幾鐘, 精神咗好多. 要諗吓今晚potluck整咩野好. 的鄰居昨晚先打電話比我地今晚一齊預祝父親節. 咩都無準備, 唯雪櫃有咩就煮咩啦.
再去睇吓Loki, 佢都仲係無里神氣, 卷著身係咁瞓. 平時夏天佢唔係幾like佢張床, 淨係冬天先鐘意, 因為比較熱, 但佢呢兩日都係要瞓床或者瞓墊. 佢真係好唔舒呀!
今日都仲係唔肯食狗糧. 到晚上比咗的烚雞胸同少許白麵包佢食.
沒有留言:
張貼留言