哥哥家慶母親節

May 10, 2014, Saturday

佛誕假期前夕, 同奶奶,姑奶, 嬸母慶祝母親節, 今日就輪到同我媽媽慶祝啦.

同哥哥商量, 媽媽行動開始唔方便, 都係唔出去食啦, 在哥哥家食,  由我接送.  今次叫埋三個姪女都只係十個八個人.   況且哥哥嫂嫂都開始少食肉, 其中兩位姪女又素食,  屋企煮都好簡單啫.  我亦預備煮一兩個餸去, 佢地煮素, 我煮一個肉啦.

腐竹粉絲肇菜煲

炒什菇
 

 

梅菜蒸豆腐

炆芋頭

今晚唯一兩個肉就係呢碟魚肉煎蛋

 

仲有我整嘅咖哩牛筋腩煲

再加埋我整嘅拍黃瓜

涼拌木耳

六素二肉,  仲有個雲腿煲雞湯, 好正呀!

  
飯後哥哥即時整薑汁撞奶, 佢每次只撞三碗, 分三次, 每次都成功呀!

無加糖, 食時加蜂蜜.

 

不過奄尖嘅型爸, 佢話的薑汁有澀味, 唔like呀!   我以前整過薑汁撞奶, 成功就好囉, 唔成功就要飲薑汁奶.   哈哈, 都係用薑糖燉奶算啦(阿Q精神).

兩位姪女買了蛋糕來慶祝母親節

 

而第三位細姪女今天正日生日, 換個牌又變生日蛋糕.

其實我整了香煎蛋糕及Brownie, 一次過食唔哂, 咁就分比佢地拎返屋企食啦.

食完我地趕著走, 二公子要返夜更, 哈哈, 我地仲有節目, 收到林太whatsapp 我地晚上去佢屋企飲野呀!

原來今天係林太同林老闆結婚周年紀念.   再諗吓, 今天5月10日, 係我地搬嚟呢個屋苑六周年紀念呀!   真係高興, 飲杯!   不過我無得飲, 飲水咋, 我胃痛, 食緊十日抗生素, 不可飲酒呢!