高流灣行山樂

March 22, 2015, Sunday

 
咦! 咩事, 邊道嚟架...好似船倉咁嘅?

 

好什亂喎....吓屈蛇...

kakakaka....真係船倉嚟架, 不過唔係屈蛇

 

我地今日行山之旅去高流灣, 要坐船去架... 呢頭先嗰三張相, 就係呢隻船船頭下面個倉

呢隻船係帶我地行山嘅蝦叔, 佢好朋友嘅船.  佢地久唔久會出海打魚潛水架.

我地由三門生過嚟, 船程大約十幾二十分鐘...哈哈, 我全程响船倉入面, 唔肯上去, 因為大風得制, 我唔止驚暈船浪(己經食定暈浪丸), 係驚吹到頭暈, 行唔到山呀!

今日好勁呀, 陶媽帶埋佢對寶貝同爸媽, 一行六日上船, 再加埋我地七位仲有船長, 一行十四人呀!  一個三歲, 一個五歲....一陣要抱抱, 點算.

呢道叫高流灣碼頭, 我地先研究吓的行程

原來蝦叔都未行過架, 無緊要, 我地咁多人一齊行, 應無問題嘅.

我地決定向蛋家灣出發

出發前首先要問問大家要唔要先去公廁,  一陣邊道有公廁都未知.

呢道只有65個信箱...唔通只有65戶?

呢道的風景好靚呀!

呢棵大樹, 樹身長滿了植物, 咁奇怪嘅

當我地行咗十幾二十分鍾....哈哈, 行錯路...去咗呢個唔知咩野蛋家灣中心

咁我地去返分义路, 再去深灣方向行

經過見到呢的植物好意呀

一條條生得好高, 但唔知係咩嚟呢!

呢的山路, 好似好耐無人行過, 唔似我地之前行嘅郊野公園行山徑

的路好窄, 石級鋪滿落葉


哈哈哈哈, 我地去到深灣啦, 大約都只係行咗40分鐘, 已經係盡頭, 無得行啦.

不過响道見到的水上屋

馬來西亞嗰的係高腳屋, 我地呢的係水桶屋

唔嚟過, 真係唔知香港仲有呢的水上屋 (好似大澳仲有)

其實我地應該行去赤徑方向

但呢條路就比較窄

又或者跟其他行山人士行過嘅方向(的行山人士通常都會札條絲帶在樹枝上作記認.   但今日陶爸陶媽帶了兩個小朋友, 實在唔適合行呢的路.   咁我地決定回程, 唔行咁遠啦.

頭先經過都無留意的花咁靚

好快又返到碼頭

陶媽同的小朋友去酒樓等我地, 我地繼續向另一面行吓先

經過高流灣村公所

呢位唔知係咩人呢

呢間屋起咗五十幾年, 呢款建築, 而家唔會有啦.

行咗十幾分鐘已去到另一面....又係無得再行, 再行要上山.

風景好靚

點都影多幾張相啦

無端端起個咁嘅亭, 哈, 遮風擋雨都唔係好得喎.

佢地話對面個島就係塔門啦...講咗我都係唔識

又到午飯時間, 蝦叔已經訂了位


呢間叫石記魚村士多....我地响附近唯一見到嘅一間

紙巾盒都影...

 

係喎! 孖盒裝好特別麻.

海鮮嚟啦....

鮮魷冷盤

白切雞, 非常有雞味道

芋頭腩肉

好腍好好味呀!  我同型爸每人食半件

白焯生菜...細碟的啫

粉絲蒸元貝, 無殼仲方便食

煎大蝦

勁爽彈牙墨魚丸

西芹炒什錦

蒸大海班....條魚蒸得好滑好好味呀!

蝦哥再叫多碟煎墨魚餅....哈哈, 大家都飽啦, 要勸食先攪得掂.

的男士開咗五六枝啤酒, 呢餐食咗HK$2200, 我地十二大兩細, 抵食啦.

食完响碼頭休息一陣先上船

又回到呢個船倉

我地的女士, 全部都唔肯上上面吹風呀!

我地响三門仔碼頭落船...

望過對面就係李嘉城起嘅...咩慈山寺....有機會去行吓先.

下星期日唔可以去行山啦, 因為清明快到, 我地要提早去拜山呀!