剪綵

April 30, 2016, Saturday

哈哈哈哈, 我的新玩具攪咗三個星期, 今天卒之可以剪綵啦. 

登登登登....(張蓋布好老土呀! 但買張檯送的, 都要用架!)

掀開塊絨布, 就當做剪綵架啦!   今日搵咗麻煩鬼, 仲有鄭媽媽, 呢兩位都係多年前嘅舊雀友.  哈哈, 都唔好話唔耐, 兩年幾都無同佢兩個打台灣牌啦.   以前鄭媽媽未結婚時响我地公司做, 放工後約埋去雀會打幾圈先返屋企.   大家傾開都覺得當年好開心, 好好笑.

呢張番數表, 都係多年前上網check哂麻雀法庭先議訂...哈哈, 幾認真呀.  而家一樣拎番呢張過咗膠嘅番數表出嚟, 睇吓個日子, 九年啦.

開機打牌, 大家都好興奮....

呢兩副麻雀, 並唔係原裝送嚟嗰兩副, 原廠無咁細號麻雀.   呢兩副細一號係我在另一家訂, 估唔到更快收到,  如果唔係今日都無得剪綵..   另一副退咗, 到今日我地未收到呢!

咁邀請人嚟剪綵, 梗係要食晚飯啦....  五號屋已經預備好六餸一湯... 我買餸及定菜單, 仲要教埋佢點煮, 咁我先可以去打麻雀.   咁當然型爸係我地嘅"櫈"腳王, 不過櫈吓櫈吓, 佢都櫈咗兩個東, (即係八圈呀!)

今晚菜單:

焗雞翼

泰式汁蒸星鱸

潤腸炒椰菜

炒素什錦

麻婆豆腐

涼拌菜就係麻醬涼拌鮮淮山.

六個餸加一個雪耳螺頭湯...當然好夠食啦.   佢地話好豐富, 我屋企的餸好好味呀!   通常都係咁架啦, 隔離飯香麻!

擬訂菜單時要考慮一個焗, 一個蒸, 一個涼拌, 咁開鑊煮嘅就只有三樣餸, Cindy 就容易處理啦.

今日嘅剪綵過程都有的唔順利, 因為我訂嘅麻雀比原先嗰副小號, 打咗十鋪八鋪就有卡牌嘅情況, 結果要由型爸落場, 我去同廠家聯絡如何修理及稍作微調.   咁响小休嘅時候就維修....哼哼哼, 我同型爸都變咗熟練嘅麻雀機維修員啦.     幸好到最後四圈一的都無卡牌啦.

今日五號屋"包艇"呀.....大輸家兼包飲包食包接送....不過, 都一樣咁開心呀!