菜心黃花魚粥雀局餐

August 14, 2016, Sunday

自從加拿大回來之後, 的雀友都已經約過我幾次, 一係呢個唔得就係嗰個唔得.  我就一的都唔熱心, 因為顧著一家人去捉精靈, 覺得好開心呢!

但其中一位雀友師太, 佢實在好鍾意打麻雀, 不停的約還有鄭媽媽呢位雀后, 就算加埋我都仲欠一隻.   佢地想型爸打, 但我話唔可以, 我地其中一個要負責捉精靈.  哈, 點知呢個師太去搵一位外援, 咁打就打啦.

呢排我個心去咗捉精靈, 無咩煮意, 唔想諗著咩野餸, 煲粥炒麵就算啦.

先嚟札肉魷魚炒薯粉

乾炒黑椒雞絲意粉

上湯浸時菜

薑蔥炒鴨殼, 呢, 响北京老家攞回來的填鴨殼, 非常好味呢!

仲有今日主打, 菜心黃花魚粥

蒸咗八條黃花魚拆肉.  不過今日Cindy有的大意, 仲有的細骨.  

菜心一斤, 焯熟切粒

煲一煲好稠嘅粥, 再用雜魚淆個湯加落的粥道做粥底.

咁就成為呢碗非常好味的菜心黃花魚粥.....  型爸食咗三湯碗呢!

今日都幾好笑, 鄭媽雀后都有捉精靈, 另外那位外援又捉.  初時一邊打一邊捉, 結果攪到無哂波個電話又無電.   哈哈, 係呀, 我屋企都有好多精靈捉, 但無補給站, 咁佢地先專心打麻雀啦.

至於我呢就梗係唔怕啦, 有型爸幫我麻, 佢同二公子出去補給, 都攞埋我個手機一齊去.   嘻嘻, 我一向用開兩個電話, 比一個佢攞咗去我都仲有一個可以聯絡...正呀!

今日心情好, 唔使輸錢呢!