Canada Trip - Day 6

July 5, 2016, Tuesday

今天真開心, 四兄弟姊妹一齊去Niagara Fall, 一行十一人, 分乘三架車出發.

每次嚟多倫多, 都會去Niagara Fall, 三年前嚟參加大公子畢業典禮, 仲响呢道租咗一晚酒店, 個房間打開窗就對著個瀑布 .  五哥一家未嚟過, 今次一家要同佢地嚟, 但今次編排緊密, 就唔可以响呢道住一晚啦.

世界七大奇景, 每一次睇都係覺得咁靚.

睇完瀑布, 少不免都要去賭場行番一轉.   哈哈, 不過我同三家姊都無興趣, 坐响出面等佢地.

跟著我地開車去周邊一個小鎮, 叫Niagara on the Lake.  呢道都係旅遊區, 但食野無Niagara Fall 嗰邊咁費.

呢道仲有馬車坐呀!

我地都係隨便搵間餐廳

各有各叫啦.

哈哈, 各有各比錢.

食完午餐再去食雪糕, 呢間Cows好多一排隊架.

當我地同雪糕影合照, 四哥叫等埋佢, 嘩! 我地都只係叫一個Cone, 佢打孖上呀!

跟著我地就去咗outlet mall shopping....時間緊迫, 我地只有兩小時搏殺, 因為今晚訂咗位食晚飯呀!     呢道的Columbia 運動衫好平呀, 花咗好多時間挑選, 兩小時只行了三間商店....唔夠時間呀!  姊夫話唔緊要, 今日買著咁多, 我地去完Montreal 回來, 星期六可以再去Missuisagga 另一間outlet, 到時大把時間去買.

由Niagara Fall 返多倫多, 開車都要兩個幾小時呀!

 

 四哥在魚樂軒訂咗位, 十五人大檯呀! 

我地要咗個十二人餐, 應該都好夠食, 因為呢道嘅龍蝦, 通常都會加多幾磅, 皇帝蟹又會加多幾磅.  我地十三個大人兩個小朋友, 只要加多三隻金湯蠔就得啦.

睇吓隻龍蝦幾大隻, 跟著隻皇帝蟹仲大過隻龍蝦, 重到一隻手都拎唔起呀!

例湯先上

呢隻金沙蠔都幾美味, 用咗鹹蛋黃整嘅炸蠔, 唔錯唔錯.

好美味的蒸皇帝蟹

龍蝦要咗兩食, 美極及避風塘兩款....

真係好誇張呀!

仲有豉汁蒸盤龍鱔

仲有清蒸海斑

蝦膏炒飯!

仲有杞子浸菜苗

 
甜品係芝麻糊.

今日係四哥兒子的生日, 我地買咗兩個蛋糕同佢慶祝

埋單C$850, 呢餐四哥話佢請, 吓, 咁梗係唔得啦,  照先前講定嘅遊戲規則, 大家AA制, 小朋友唔計.  哈哈, 咁咪大家高興囉.

食完大家早的返屋企, 今晚早睡, 明天早起... 我地要去三天Montreal 及 Ottawa呀!