本來很開心的假期, 今早發生了點意外,
早上大約五時, 睡到矇矇鬆想去洗手間, 套房入面有洗手間, 點知型爸的生理時鐘又去同我一樣, 佢先入咗去, 我們的房間近後樓梯, 一落去有一個洗手間, 咁我諗落一層好近, 去完快的上嚟再瞓過. 唉, 點知真係好快, 朦朦鬆鬆穿了洗手間的拖鞋, 樓梯鋪了地毯, 我一踏上去就已經滑了下去, 左腳直, 右腳屈, K字型的跌了八級樓梯, 當時痛到起唔到身, 又無人知道. 唯有坐定定慢慢將右腳放直, 檢視吓傷勢. 右膝痛得要命. 因為樓梯鋪了地毯所以滑了下來(平時上落都不穿拖鞋), 但亦都因為鋪了地毯沒有骨折, 只是內右膝有點腫脹, 即是拉傷了右膝蓋韌帶. 跛吓跛吓去咗洗手間, 再慢慢上樓梯. 可以行, 但腳提唔得高, 只可以一級一級行上去.
跟著叫型爸攞的冰, 敷著冰, 再搽的藥膏(咁啱去costo 買咗一pack Voltaren, 即刻有得用). 敷咗冰又真係好的. 但據我之前練瑜珈拉傷韌帶(同一位置), 起碼要八九個月先至好呀! 唉, 有排痛呀! 哈哈, 跛吓跛吓都行得都算好彩. 如果骨折唔行得, 要入醫院就敝啦, 哥哥就好擔心, 我响佢屋企整親, 佢梗係擔心啦.
為咗唔想大家擔心, 搵個腳套紮著右膝, 盡量行得自然的啦. 仲跟埋去行Outlet 添. 呢間Outlet好近機場, 亦都好近哥哥屋企. 行短時間, 集中行三兩間店, 又可以掃的貨.
午餐姪仔叫我地試吓outlet入面間日式熱狗店. 大家各有各叫, 我叫咗呢款熱狗, 好辣呀!買完就返屋企休息吓, 五點先再出發.
我地先去賭場登記做會員, 哈哈, 唔係去賭錢, 最主要係攞咗張會員咭, 食自助餐有九折呀!
姪仔訂咗River Rock Casino Resort 食自助餐
真係估唔到, 咁大間酒店嘅自助餐係唔得嘅, 由其是係的肉類, 牛仔肉, 燒排骨, 全部都唔得.
姪仔姪媳話嚟過咁多次都未試過今次咁差. 哈, 莫非今日星期四價錢平的無好野食?
食完返屋企仲係好早, , 哥哥佢地話做吓運動, 去後花園摘黃金梨呀!
哈哈, 我呢個傷兵唔可以摘, 但我都有的作用架. 佢地摘, 嫂嫂揀的熟嘅, 明天我同嚟做果醬.
沒有留言:
張貼留言