不可獨留兒童在家中

2012年1月15日下午11:08公開累積瀏覽 337 4

January 12, 2012, Thursday Night


政府都有勸戒市民, 唔好獨留兒童在家中, 我地而家受到教訓啦.

昨天已經同型爸商量, 點算好呢, Ruby放假, Mrs Kua又去咗旅行.  真係無辦法, 又要獨留Loki在家中數小時.

响網上search過好多資料, 雪橇平時可以好乖, 但最怕寂寞, 留佢一個喺屋企, 佢會發脾氣, 咩都做得出.

上次留咗佢喺户外三小時, 不段悲鳴, 又去後園掃跌的小花盆, 又去咬前門嘅羅漢松,  好彩淨係咬咗少少.

為咗教Loki自己出去大小二便, 我地喺後門做咗塊活門, 比佢自由出入.

我地有的心軟, 因為今天有小小落雨, 雖然車房有蓋, 諗吓都比佢入屋啦.  將一塊木板再用張長櫈頂著, 將廚房格開, 等佢可以從後園入廚房....  點知佢好大力架, 連塊板
都撞開, 結果......

二公子第一個返到屋企, Ruby跟著返.....


一入門口, 一副咬爛咗嘅太陽眼鏡, 東一片西一片, 我將佢放埋一齊影


呢個係平時燒烤蜜糖嘅玻璃杯, 入面裝滿提子乾, 平時陶陶同林小b嚟, 我比佢地食, 但係Loki一次過食哂.   唔知係咬爛定點樣打爛個杯.... 應該唔係跌爛啩, 見唔到其他玻璃碎. 隻杯我地喺梳化搵到, 我諗佢係跳上梳化慢慢食哂的提子乾.


撕到爛哂嘅狗糧袋, 專登留起, 諗著下次照普買.  又係喺梳化發現...  平時我地唔準佢上梳化, 佢今日做哂.  佢真係撕到個袋好爛.   好彩唔係咬爛袋狗糧, 比佢食哂實飽死都得啦.


第二災區, Ruby房間地下, Ruby話佢關咗門, 可能無關實, 比Loki撞開咗, 跳上佢張床, 响床頭櫃咬咗佢副太陽眼鏡, 再咬佢包化妝綿....

幸保不失嘅擦牙捧捧, 包裝太實淨, 佢咬唔開, 淨係包裝有的破損

從台灣帶回來嘅花生.  淨係咬爛咗膠袋, 食唔到.

廚房垃圾桶比佢拆開, 好彩Ruby一早將的垃圾清理,  但係個膠袋都比佢撕爛


上埋二公子房, 不過又無咩破壞, 都跳上佢張床, 咬爛之追風油個盒, 但好彩咬唔開支油, 不過佢好聰明, 聞到的油佢都唔鍾意

佢又咬開個盒香口珠, 有塊野頂著, 只係跌咗一兩粒出嚟, 佢有咬過粒香口珠但係無食, 我諗佢唔鍾意薄荷味.


擔心咗好耐, 卒之清理現場時, 搵返塊玻璃碎, 無食到落肚.  咁尖, 食咗落肚都真係腸都穿.   個杯蓋都喺梳化底搵番.


Ruby出去掉垃圾, 又見到佢成包化妝綿嘅屍骸, 散落滿地.  真係好得意, 破壊力強, 每一樣都比佢整到散哂.

今次我鬧Loki佢好似唔係好驚咁喎, 我一指著佢, 佢即刻搖尾行開, 我地搵野執拾清理時, 佢又行到老遠....

到型爸返嚟, Loki跟著上房, 我show的相比型爸睇, 輪到型爸鬧佢, 型爸又作勢輕力打佢, Loki又駁咀喎...

型爸: 你做咩咁頑皮, 哎爛哂的野..
Loki: 嗚嗚嗚哦哦哦 (你地做咩掉低我一個呀!)
型爸: 你咁頑皮, 係咪要打呀!
Loki: 嗚嗚嗚哦哦哦 (唔好打我呀, 我好驚呀!)
型爸: 知驚你又咬爛的野
Loki: 嗚嗚嗚哦哦哦 (我一個人好悶唔開心吖麻)
型爸: 你再係咁, 我就唔鍚係你啦.
Loki: 嗚嗚嗚哦哦哦 (咁以後唔好掉低我一個喺屋企囉)

人狗响到對講咗好耐喎.  Loki好似真係想講野咁架.

不過型爸點捨得吖, 鬧完又攬番Loki, Loki又去強吻型爸.....

Ruby嘅損失, 梗係由我地嚟賠償啦.

好彩佢今次唔係食咗好多其他野, 亦都無去咬爛的傢俱, 都算好彩.  唉! Loki我地都唔想, 但係人都要放假, 我地要做野加麻...

我地已經同咗奶奶講, 團年同初一去拜年, 都要帶埋佢去呀!