先幾日睇到大少奶個blog, 教用煲完湯嘅瘦肉嚟整豬肉絲, 見到真係兩眼發光. 好多時煲完湯嘅瘦肉都唔會食, 一係益Loki, 但都唔想佢食咁多豬肉. 而家的瘦肉另有出處, 可以用嚟整小食, 真係環保又慳家, very like呢!
煲完湯嘅瘦肉, 先撈起待涼, 跟著撕成幼幼一絲絲咁
調味料有三種, 咖哩粉1茶匙, 生抽1湯匙, 糖1湯匙, 我喜歡有少少辣, 再加了辣椒粉
白鑊, 用中小火將瘦肉炒至乾身
加入調味料繼續炒 (一家要慢火)
落咗糖同豉油之後個鑊好易燶, 要快手炒(但慢火) 好彩我用五層鑊, 個鑊燶咗都好容易擦乾淨. 用LC唔知會點, 我唔試呢!
炒到乾身香口就得啦, 盛起待涼....個樣係咪好得呢?
放入個樽就得啦. 食落真係同出街買嗰的好似架!
如大少奶所講, 調味料自己試味落多少啦, 我最後都落咗1茶匙半咖哩粉, 加1茶匙辣椒粉, 唔食辣就唔好加, 至於豉油同糖, 我就無再加啦.
第二天比型爸食, 佢話好好味喎....嘻嘻, 開心呢! 以後的煲湯瘦肉有出路啦...
沒有留言:
張貼留言