生滾豬什粥 + 札肉炒米粉

February 1, 2015, Sunday

昨日去行市買餸, 見到鮮豬腰, 豬潤, 豬心...諗起好耐都無煲過豬什粥, 一於買啦.  買完未煮, 講比型爸知佢已經好開心. 

買咗返嚟問Cindy識唔識洗豬腰, 佢話咩都唔識...咁無法, 由我自己嚟, 將的豬腰起哂的白筋, 再浸水, 咁就無哂的味, 豬心又係要起咗的筋, 咁就唔會韌.  要分別用豉油豆粉糖醃好放入雪櫃.

今早去行山, 用shuttle chef 煲咗個瑤柱白粥做粥底

晚上就用粥底生滾的豬什

 
食時加少許海鹽....真係好好味呀!  

食粥咁單調, 梗係要炒個米粉啦.

不過唔係我炒, 我要Cindy粉, 我口講, 佢做, 唔係佢又話唔識, 咁我又做埋.

哈哈, 佢慢吞吞將的紅蘿蔔切花, 切咗的比我叫停, 切花係好靚, 但咁大塊, 型爸同二公子一定唔會夾嚟食... 我一於刨絲, 炒落的米粉, 咁佢地想唔食都唔得.

 
所以的紅蘿蔔好似亂哂籠咁.   哈哈, 係唔靚, 爆香都係咁食.

 
再加的札肉一齊爆香盛起.


跟著先炒米粉, 最後加埋的配料炒勻.

的米粉都ok好味架, 不過我就好忙啦, 碗碗粥都要生滾, 滾完一碗再滾一碗, 咁的豬什先可控制得好, 攪到滾完都唔記得影相啦.

不過見到型爸好開心咁食兩大碗生滾豬什粥加炒米粉就開心啦.

二公子仲麻煩, 要生滾豬什粥, 滾好的豬什唔食, 淨食粥+炒米粉...哼.  跟著仲要滾埋比Cindy食, 最後先輪到自己...你話係咪好唔得閒吖.