拆肉泥鯭粥 + 豉油皇炒麵

November 1, 2015, Sunday

為咗Whisky仔, 我同型爸今日都取消行山, 留在家中陪伴兩隻狗狗.  的藥力過咗, Whisky仔就醒晨好多, 但兩隻狗唔識遷就, 一埋身Whisky仔就痛到嗯嗯嗚嗚.  Loki好呷醋, 頭呢幾日要分開兩隻狗先得呀!

 
昨天去街市, 見到有泥鯭, 細細條好新鮮, 最後幾碟比我全部買哂(差唔多成百條).  今日整拆肉泥鯭粥!

 

細條泥鯭的肉滑的, 不過拆肉就要花多的時間.   的肉拆好, 有一大湯碗呀!  而的魚頭同骨無嘥架, 放入魚袋, 淆的魚湯.

 

呢的係蒸魚後嘅精華, 一陣會放落的粥到.

用個萬能煲淆個白粥底, 落咗兩杯半米, 預咗會好稠架.!

煲泥鯭粥不可決少的果皮.   呢的果皮大大話話都有三十年, 係奶奶當年送比我架.   真係好香

的白粥底煲好, 轉落皇后煲加魚湯加果皮用明火再煲

食時先再加的魚肉落去, 加咗魚湯孫肉之後成一大煲, 再加的鹽調味.    試味....不得了, 好鮮甜呀!

食粥梗係跟炒麵啦, 今日用銀牙+韮菜花嚟炒麵呀!

都唔知幾時變得咁貴, 一斤銀牙要HK$12

韮菜花後而平的, HK$10有三札

 

全蛋麵十個, 用水浸軟浸鬆, 跟著瀝乾水份

用老抽生抽糖水調一個豉油汁

的麵未炒之前, 先用調好的豉油汁先將麵撈勻上色

跟著炒芽菜韮菜花, 落麵.   原來炒十個麵餅好辛苦架, 麵多鑊細, 我加埋Cindy四隻手我用筷子佢用鑊鏟, 一齊炒先攪得掂. 

炒到咁上下要再試味, 最後加的麻油用芝麻就得啦.   又炒都又要顧著煲粥, 仲邊有手影相吖.

炒好半碟先上, 睇落係咪好掂當呢!  跟著再上埋另一碟.

今日做咩煲咁大煲粥, 炒十個麵餅, 因為我要招呼我地行山組員呀!   雖然今日無行山, 佢地行完就嚟我屋企食.  到佢地大軍行完山殺到 (佢地話涼都唔沖要即刻食咗先呀!),  即刻攪到我手忙腳亂.

大家比面, 成煲粥只係食剩一碗, 而的豉油皇炒麵一早就KO哂.   而我呢個响廚房騰出騰入嘅就係食得最少嗰個啦.   無去行山, 我一樣出到大汗搭細汗.