煌府晚飯

October 23, 2015, Friday

昨天同型爸的舊同學食晚飯, 今日我就約咗幾位老友食晚飯.  只係幾位女士, 無型爸份呀!

約咗佢地去煌府.   哈哈, 選擇煌府,唔多唔少都係為咗個杏汁豬肺湯

仲想試吓特價片皮鴨同埋龍蝦孖寶


一早訂定杏汁豬肺湯, 唔想去到話無呀!


其實一盎湯睇落大, 真係唔多, 撈起的湯渣, 每人只係碗多少少.

至於片皮鴨就真係平, 早一天預訂, 只係HK$38一隻, 而我地只有四位, 只可叫半隻, 即係HK$19.   蒸籠內有8片粉皮, 都幾大塊(呢個係大蒸籠)

HK$19半隻即係有幾多片鴨, 就係呢碟, 大概有8片皮連肉, 跟著有兩塊係油, 根本唔會食.   哈哈, 我諗佢地計過數, 8 片粉皮8片鴨肉.    但呢碟鴨嘅味道真係唔得, 的鴨羶味真係幾難頂, 尤其是有油的部份.

 

 龍蝦伊麵, 我本身唔食得伊麵, 一食就胃痛.    我叫比佢地食, 但的汁好鹹呀!

配孖寶, 我地要咗呢浸勝瓜.

的食物煮得麻麻都算啦, 最唔like就係嗰位著黑西裝的男侍應(定係經理), 晚飯呢邊只有幾檯客.  (另外一邊有婚宴酒席), 我地點小食, 佢呢樣話無嗰樣話無 (但餐牌無貼著無, 但有幾款已經貼著無供應),  其實無唔緊要, 但佢應對的態度令人好唔舒服.   我地問有無煲仔飯, 佢話無, 有無糯米飯, 佢話無, 有無炒飯, 佢話有, 咁比餐牌我地睇, 但攞嚟嘅餐牌係無炒飯炒麵之類.   最後我地响餐牌發現有生炒糯米飯, 問佢點解話無, 佢話係無煲仔糯米飯...真係比佢激死.   咁就叫生炒糯米飯啦.

另外叫咗賽磅蟹, 好大碟但味道麻麻

呢碟涼拌木耳就無問題啦.

 
原來叫吓叫吓我地都叫咗好多野, 埋單HK$675, 每位HK$170都好經濟.

呢道嘅晚飯價錢經濟, 但湯得小菜麻麻. 相比起陶源的野好食好多.

伊麵同糯米飯都食唔哂, 打包啦...外賣飯盒加膠袋....盛惠HK$5.