Baby Blue Cafe & Bar (KMB) 小男孩餐廳(九巴店)

2010年8月5日下午2:53公開累積瀏覽 362 8

相約老友, 於Baby Blue Cafe & Bar 食晚飯....

 

幫襯Baby Blue Cafe & Bar 多年, 由最初百德新街, 搬至銅鑼灣廣場, 到而家灣仔莊士敦道.   而九龍嘅美孚店去得最多.  最新嘅九巴店都嚟咗幾次.

 

初時揾呢間新九巴店嘅入口, 都有的困難, 佢嘅地址喺荔枝角道寶輪街9號5樓5A, 但係外面睇係九巴building正門, 無Baby Blue 嘅招牌, 唔係好敢行入去.   而另一面入口喺荔枝角道, Pizza速遞隔離, 好似後樓梯咁, 經過唔覺係餐廳入口.  唔起眼, 燈光又暗, 嗰部電梯, 似部殘舊送貨電梯.   雖然上到去間餐廳裝修頗有格調, 但樓下入口就打哂折扣....  
今次去到開心咗的, 因為已熟知兩邊入口, 响荔枝角道嗰邊似後樓梯嘅入口, 已經整番靚咗好多, 嗰的殘舊Exit牌已經換哂, 部電梯已經整番靚靚.    其實佢真係應該楝個木stand响樓下, 放個餐牌, 等人知道, 嗰度係餐廳入口, 有的咩野食.

 

Baby Blue 嘅食物質素, 一向都保持水準, 呢個亦都係我常幫襯嘅原因.   初時搬咗去九巴店, 平時晚上人流好少, 好驚佢做唔著...  成日都想比的意見佢地improve 吓, 等多的客知道有呢間餐廳响度..  因為喺呢區想搵間有質素嘅餐廳都好難, 價錢合理, 食物又能保持一貫嘅水準...

 呢張係Baby Blue 張咭片, 成隻藍貝咁, 好得意. 

A la Carte Menu... 每次嚟都會叫藍貝...另外仲有個set dinner餐牌, 價錢由hk$78-hk$198, 好似有幾送一優惠(但我無留意, 無睇嗰個餐牌), 兩個朋友揸主意選主菜, 我食咩都無所謂...
我地四個人, 叫咗兩個set dinner(一個casual set, 一個deluxe set), 一客Mussels, 再加一客焗薯皮...  問過個restaurant manager, 佢話應該夠食, 唔夠先再叫啦...  叫完野, 佢地就上咗house made面麵包&香草牛油..

 的house made bread 唔錯, 香草牛油好正.

 兩個set dinner, 跟兩客appetiser.  呢客係沙律, 唔記得影相, 唯有影分咗落隻碟呢的啦...  另一客係薯蓉焗田螺, 只得三隻, 我三個朋友食咗. 又唔記得影相.. 
餐湯我地揀咗呢度好正嘅周打蜆湯.   去過好多地方飲周打魚,  周打蜆湯, 都係麻麻, 有時仲有腥味.  呢度嘅周打蜆湯, 每次都保持水準...好味.  (又係顧著傾謁, 咩相都唔記得影)

 的焗薯皮都好正.  顧著傾謁, 成大碟送嚟唔記得影相, 又係等到分剩先記得影.

我同幾個老友, 都鍾意食芝士, 叫咗cheddar Cheese mussels 配薯條, 嘩, 的汁好好味呀!   問佢地再要多客麵包醮的芝士汁嚟食.
主菜我地揀咗紅酒蘋果雞絲闊條麵(唔記得個全名啦), 同埋紐西蘭肉眼扒... 闊條麵個汁調得好好味... 當我地食肉眼扒時(我地要七成熟, 唔要有血), 有三個話好味啱啱好, 一個話好嚡, 咁我地就研究吓點解啦!  原來我個朋友連食兩嚿都係邊邊位置, 可能overcooked 咗, 後尾叫佢試吓中間位置, 佢話好食好多....  食哂兩份主菜都唔記得影相, 你就知我地有幾好傾啦....

 呢個係跟deluxe set嘅甜品, blueberry mouse cake.   我已經好夠, 又唔鍾意食mouse cake, 叫的朋友大家share咗佢, 佢地都話幾好味.

有一個朋友想飲咖啡, 即刻叫佢試吓.  因為呢度的咖啡好得.  我現已戒咗咖啡, 雖然久唔久飲吓, 但夜晚就唔飲, 費事瞓唔著啦.   如果嚟食午餐, 通常都會叫杯飲吓.
呢餐真係好夠, 其實去到食主菜, 已經飽, 要大家互相"勸食"先清埋的主菜.

至於服務方面, 我地都好滿意, restaurant Manager見我地四個女士, 都比意見叫我地唔好叫太多, 食哂先再叫.   至於waiter方面, 都唔錯, 每次好快同我地換碟, 仲不停幫我地加熱水...  我地真係有講不完嘅話題, 要不停飲水(仲要飲熱水)...

呢餐晚飯, 我地未夠七點已經到, 食到十點... 埋單hk$596未折, 有VIP card有折.   人均消費, hk$135 -hk$150... 抵....食物好味, 地方又容許我地慢慢坐, 慢慢傾, 一個唔錯嘅選擇...

又一個愉快的晚上....