2010年8月6日下午3:19公開累積瀏覽 21
權八日本料理
張檯墊好似用黑白影印.
放題嘅點菜單, 好多野食喎!
心想呢度嘅放題, 應該同其他日式放題差唔多啫. 一口氣點咗好多款食物.
的魚生好新鮮... 我地叫咗成十款, 雖然每款都係一兩件, 但嚟到都好有睇頭, 好似叫咗一客大嘅什錦魚生...
呢碟係三文魚青瓜沙律, 青瓜同的汁酸酸地, 幾開胃, 都幾大碟.
呢碗係辛辣泡菜海鮮湯... 小小辣, 但略嫌鹹咗的. 好大碗, 用個石頭鍋碗嚟上. 叫佢比兩隻碗我地分, 每人一大碗.
串燒雞軟骨&河豚魚乾, 每樣叫一串食吓
炸蝦天婦羅&炸軟殼蟹, 炸蝦我唔喜歡, 型爸要食兩隻, 個軟殼蟹就炸得幾脆身, 粉漿唔算落得多.
叫咗碗火地獄拉麵(叫咩鬼火地獄, 唔辣嘅. 唉... 差的又忍唔著食辣野). 嘩! 嚟到勁大碗... 同型爸分, 每人都有一大碗, 個胃仲邊有位食其他野呀!
金菇肥牛都係每人叫咗一件啫
鐵板牛脷+黑豚肉
鐵板七味牛肉, 使唔使咁大碟呀! 頂唔著啦...
我地第一次嚟食, 唔知的野上得咁快又咁大碟. 以上嘅野, 係我地叫嘅第一round, 亦都係最後一round... 我地簡直係要用九秒九嘅速度嚟食. 嗰的日式餐檯, 得20"x20", 邊放到咁多野.... 汽水任飲都係叫一礶, 送比你都飲唔落.
哈哈, 佢限時食兩個小時, 我諗我地食咗45分鐘已經投降...點知食放題同食A La Carte 的碟頭一樣咁大碟喎!
我地問個restaurant manager點解無甜品, 佢話而家改進緊, 遲的應該會有..., 我再問佢點解無日式芝士年糕, 佢話呢樣就真係無嘞...唉呀! 有小小失望, 上次响御八築地食過好好味架.... 不過而家佢送咩野比我地都食唔落, 做吓enquiry啫.
Overall, 的食物都幾好味, 會再幫襯. 唉!又撐大咗個胃...
埋單hk$326 (hk$148 + 10% x2)... 抵食.
沒有留言:
張貼留言