2010年10月11日下午2:33公開累積瀏覽 361
中秋節响奶奶屋企食飯, 侄女婿買咗兩盒許留山嘅芒果布丁, 當晚非常受歡迎... 諗諗吓, 呢個都係good idea 喎! 星期五晚整定, 星期六就可以輕鬆的攞去做拌手禮啦.
星期五食完晏, 去咗尖東嗰間百佳去買整芒果布丁材料.... 咦! 點解無芒果賣嘅, 吓! 買唔倒主角, 點算? 都唔理啦, 先買咗芒果啫喱粉, 魚膠粉, 淡奶...有新鮮芒果汁, 都買埋... 放工再去屋企附近買芒果....
點知下午鄭小b媽打電話嚟, 晚上有局...即刻打蛇隨棍上, 叫鄭小b媽幫忙買芒果... 真好, 鄭小b媽一口應承...
鄭小b媽嚟到話我知, 原來而家唔係糙, 好難買, 佢嗰邊嘅百佳有芒果賣, 不過係最後兩pack有四個, 有兩個唔係好熟添....見到有芒果, 唔使我週圍搵都好好啦.... 真係唔該哂!
但晚上又打麻雀, 又整火焰雪山, 結果等到打完麻雀, 所有人走哂先開始整. 零晨一點幾開始整, 攪到兩點幾成三點先有得瞓....
以前整芒果布丁會落雞蛋, 但而家好多人都唔鍾意食生雞蛋. 搵咗幾個recipe, 最後都係參考Sally Ho嘅做法.
材料: 芒果2個, 芒果啫喱粉1盒, 魚膠粉2茶匙, 熱水200ml, 芒果汁250ml, 淡奶225ml. 我預備做兩大盒, 所以要double呢個份量.
啫喱粉&魚膠粉
今次買咗子母淡奶.
買咗兩支鮮芒果汁, 每支有350ml.
呢四個芒果睇落都好靚, 但有兩個應該未熟.
將魚膠粉啫喱粉撈混, 再用熱水開溶. 再加入芒果汁, 待涼後再加入花奶拌勻. 我用兩個大湯碗分開嚟整, 容易控制份量.
將芒果切粒加入, 切第一個, 非常甜. 點知切開第二個, 有小許硬, 顏色比較淡, 切小小試吓, 嘩! 好酸. 再切第三個, 好彩, ok 甜. 第四個唔使切, 因為仲係好硬.
兩大湯碗, 分裝兩個盒, 有剩, 再整埋第三盒, 第三盒雖然未滿, 但都超過一半.
我將甜嗰兩個芒果放咗落兩大盒, 預備送比人. 試咗味, 都幾好味. 至於酸嗰個就放咗落第三盒, 諗吓都係留番屋企自己食, 酸得制唔好送比人.
睇吓整起都幾靚吖...用嚟做拌手禮都唔錯.
當晚去到朋友家, 又係食到好盡興. 晚飯後, 攞咗芒果布丁出嚟一齊食, 大家都話好好味.... 我自己都覺得幾好味, 型爸仲好捧場, 仲話要添食.
至於另一個芒果, 隔咗一晚, 外皮有的發黑, 為免嘥咗佢, 即刻切埋, 配落剩番嗰盒芒果布丁一齊食.
睇吓的芒果仲係淺黃色, 未夠熟, 所以好酸, 加咗的花奶中和一下就好的. Overall, 我就覺得太酸, 奇怪, 型爸竟然話唔係好酸啫, 好味!
沒有留言:
張貼留言