班蘭雪芳蛋糕Pandan Chiffon Cake

2010年10月26日下午4:31公開累積瀏覽 954 1

食完晚飯, 都仲係有的唔開心, 又要諗吓明天食咩早餐.  整咩好呢?  太晚了, 唔想整麵包, 都係整蛋糕好的.  應該一小時可以攪掂.

 

諗吓諗吓, 都係整班蘭蛋糕, 屋企有齊材料.   呢個班蘭蛋糕整過好幾次, 氣味清香, 不甜不膩, 好好味.   做法係參考基絲汀嘅recipe.

 

材料:  蛋5隻(蛋黃蛋白分開), 糖80g, 低筋粉100g, 橄欖油3湯匙, 椰漿100g, 班蘭香油1茶匙,

   發粉1茶匙, 塔塔粉半茶匙(可加可不加)

將蛋白蛋黃分開, 裝蛋白的盤一定要乾淨, 無油無水.  蛋白用電動打蛋噐打至起泡然後加入半茶匙塔塔粉.  60g糖分三次加入, 直至蛋白打至企身. 

蛋黃加20g糖打勻, 加椰奶, 加班蘭香油拌勻

發粉,低筋粉拌勻先過篩, 再分幾次慢慢篩入蛋黃漿內, 拌勻至幼滑, 最後加橄欖油拌勻. 輕手將打好的蛋白漿分三次加入蛋黃麵糊, 至全部混合, 切勿大力攪拌.
Preheat 焗爐170c 

先將焗盤掃油, 加入麵糊. 

基絲汀嘅recipe話入爐15分鐘後, 調低至150c, 全程約需35-40分鐘.   但我唔記得調低度數, 結果好快爆面

睇吓唔對路, 焗咗25分鐘,  用木籤插入蛋糕中央, 無蛋糕黏著, 熟咗, 馬上出爐.

倒扣於架上.   又係衰心急, 未涼透就脫模...脫模脫得唔靚.  仲有的蛋黏喺個焗盤.   不過呢個蛋糕真係好少油, 我呢個已經係不黏底焗盤, 但都仲係黏得好實.  

記得第一次做時, 基絲汀個recipe無講話要將個焗盤掃油(無法, 新仔咩都要人講先至知), 個焗盤無掃油, 真係脫唔倒模.  最終要用刀仔慢慢撬佢出嚟, 脫模之後梗係好醜樣啦.  不過的鄰居好幫手, 一二三幫我食哂佢.  第二日唔憤氣再做一個,  個焗盤掃咗油, 脫模易好多.

今次個蛋糕雖然脫模唔靚, 但自家食唔緊要啦...味道好好架... 焗緊嗰時, 成屋都充滿班蘭香氣, 聞到心情當堂好返哂.