The Philippine Club BBQ

2010年12月14日下午2:33公開累積瀏覽 85 0

December 11th, 2010 , Saturday

星期六晚, 相約咗一班舊同學, 去咗The Philippine Club BBQ.   真係好"背", 都唔知衛理道有間Phillippine Club, 亦唔知呢道可以BBQ, 最奇怪係個埸地好似open比香港人多過比菲律賓人.
我一位舊同學organize呢次function.  跟著佢比我地個地址, 預先check埋地圖, 用GPS帶路, 都唔難搵.  不過吐露港塞車, 差唔多到達時又miss 咗幾個路口, 都遲咗成40分鐘先至到.   好彩係BBQ, 食著先, 唔使等.

去到覺得個地方有的怪, 長長一條石屎路, 一面排滿了燒烤爐, 一面排了檯椅, 中間剩下一條窄窄的路比人行.

呢邊係燒烤爐, 背面己經係檯椅.

一邊燒烤, 一邊坐滿人食野, 都真係幾迫.

我地七點幾去到時有三份一爐未開, 但走時的爐好似開哂, 我諗當其時嗰度都有百幾人.

食物都係的大路野, 蕃薯, 粟米, 多春魚, 獅子狗, 雞中翼

豬扒牛扒, 幾款腸, 雞全翼..

食物質素真係麻麻, 不過唔係要求的咩, 任攞任燒, 一定夠飽.

汽水啤油任飲, 有支裝可樂忌廉, 其他都係大陸牌子汽水啤酒, 有的牌子出面都未見過.

去到佢地已經食咗頭一輪, 又燒咗的野食放响到, 我嘅第一輪就可以不勞而獲, 快的醫咗個肚先, 跟著全程要勞煩型爸代為燒烤, 招呼我也.
hk$150per head, 其實以我地嘅食量, 飲量, 就真係唔抵.  不過如果喜歡飲啤酒(唔介意咩野牌子)又辟得吓, 咁飲佢十礶八礶, 可能抵的.   不過市區地方燒烤, 實要收番咁上下錢.

我最唔喜歡就係地方太暗.  去到時, 草地滾球場仍開著燈, 點知一到八點, 即刻關咗幾支大射燈, 當堂黑麻麻.  一輪衝鋒, 都食咗好多野.  當晚後期頗大風, 吹到鼻水都流埋, 唔夠十點, 我地都係就先走.

返到屋企上網check吓呢個Philippine Club BBQ, 吓! 惡評如潮喎.  其實有時都係睇吓自己點諗, 不要有太大的期望, 又唔係要食的咩, 咁就無咩所謂啦. 可以同的舊同學久別相聚, 仍是一件開心快樂事, 多謝Sherman Smile 的安排....