Bagel

Apr 12, 2012 9:41 PMPublicPageviews 154 1

April 8, 2012, Sunday, 復活節假期

超手痕, 好想整麵包呀!  先兩日型爸都仲係唔舒服, 顧著煲粥煮麵煲湯.   佢無事啦, 我可以用的時間嚟玩吓啦.


嗰日睇免費報紙, 教整Bagel, 的材料同平時整麵包無咩分別, 但係最特別係做型後要放入沸水中煮20秘, 好得意喎, 好想試吓呀!

又係用湯種呀(原recipe無話要用湯種)!  50g高粉, 250g水, 煮成糊狀, 待涼就用(不過唔夠時間, 放入冰格急凍30分鐘).  煮起有297g, 120g用落Bagel 麵包, 剩下就加落預備做芝士麵包嘅麵團. 

又係搵個麵包機partner出嚟幫我搓麵團.  左面比教大團嘅係一陣要嚟做芝士火腿麵包架.  而細麵團就係用嚟做Bagel

比高麵包材料: 300g高粉, 糖12g, 鹽4g, Yeast 6g, 湯種 120g, 水大約70g, (原recipe180g 水, 我加咗湯種就減咗水份), 油 10ml.

落哂粉我就走去整蛋糕, 攪掂的蛋糕的麵團就發酵好, 時間啱啱好.

兩個麵團都先分割好, 用濕布蓋著.  比高麵包先做型. 本來都發酵得幾靚, 但係我一攞起手, 佢就好似漏氣咁, 變哂型呀.

煲滾一小煲水, 放一個bagel落去, 我要用個隔, 唔係攞唔番上嚟. 我每面數20下, 諗著好好玩加麻, 點知一落去就變咗型好醜喎
 

煮熟了的麵圈重咗又實的, 我見咁樣, 唔想再煮熟其他嗰的啦,  唔想個個麵包都變哂異形呀!
 

咁唔煮就即時放上焗盤啦, 點知的麵團, 個個本來又圓又靚仔, 但係攞起一過盤, 即刻漏哂氣咁.  見到都唔開心.

咁都要焗架, 先掃上蛋汁.

210c(先預熱)


入爐焗15分鐘
 

  

咦, 焗起無咁醜喎, 變番哂圓波波咁, 當堂開心番的.  但係用沸水煮過嗰個就無再發漲嘞
   

焗好啦, 的包包好細個呀!

呢個用沸水煮過40秒嘅麵圈, 雖然掃上蛋汁, 但係焗咗唔上色喎.


呢個未有煮過嘅嘅Bagel, 食時我將佢打橫切開, 中間揸的果醬, 放入微波爐叮20秘,  咦! 鬆軟好味喎.

至於呢個煮過嘅Bagel, 顏色寧舍白. 同一方法, 放入微波爐叮20秘.  食起上嚟, 個包依依韌韌.  好似無用沸水煮過比較鬆軟好食的喎.

嘻嘻, 亦都有可能係我技術不佳, 攪到佢咁呢......