芝士火腿麵包

Apr 12, 2012 10:44 PMPublicPageviews 241 1                    
                                                                 

April 8, 2012, Sunday, 復活節假期

今日整包包好開心, 真係過足癮呀!

 

輪到整芝士火腿包啦.  呢款係二公子最鍾意食嘅.  今日整咁多野, 一款餡夠啦,

呢個大麵團用咗:

400g 粉, 糖20g, 鹽8g,  湯種177g, 水125 g, 油 40g,  yeast 7g

的麵團己經分割搓圓, 發酵, 攪掂的Bagel入爐, 其他嘅麵團, 我就開始加餡料同做型啦.

 

 
將塊麵團攞出嚟, 摺疊幾吓, 拉長,放的餡料, 跟著由闊捲至窄, 咁就得啦.

 
跟著又嚟第二個, 好快又整好啦.  不過發覺, 的火腿都係唔好露咁多出嚟, 芝士都係呀!  唔想一焗就流哂出嚟呀!

整吓整吓, 就整咗15個(我好隨意咋).   嘻嘻, home made 係咁上下啦, 個個都有的唔一樣, 咁先係手做麻.

預熱焗爐180c


掃上蛋漿

入爐焗15分鍾.

的包包焗起好靚仔呀!
 

出爐啦

 
的芝士流哂出嚟, 我都流哂口水, 好香呀!

不過唔食啦, 晚上七點半啦, 我要趕著去十五號屋BBQ呀!   食咗包包點食得落呀!   去燒野食先, 八點半先返嚟攞個Tiramisu過去.


第二朝就焗翻熱嚟食啦


配埋半杯咖啡

 

不過一轉頭, 我都未開始食, Ruby又再攞份麥皮同檸檬蜜糖(我平時食開嘅早餐)

聰明伶俐嘅Ruby係唔會轉膊架, 我話比佢聽要食麵包同飲咖啡, 但係我無話比佢聽我唔食麥皮喎(其真佢每朝一早就煮定比我), 佢就全部整哂比我食.
  

結果, 呢份就係我超豐富嘅早餐啦...(Loki見到幾開心呀....不過呢的包包唔比得佢食架!)

撕開的麵包, 鬆軟又有層次
 

仲成個都有芝士火腿添... 真係好好味呀!

型爸話好味, 二公子大讚話今次的麵包好好味(佢好少讚我架, 除非有所求啦.)  佢同我講, 媽咪, 以後就整呢的麵包啦, 唔食Ruby用麵包機整嗰的麵包呀!

吓! 阿仔, 阿媽放假先可以整喎, 平時放工返嚟都想休息吓架....你教Ruby整咪得囉....吓!佢好聰明伶俐嘅喎.
 

暫時都仲未同二公子傾掂數, 整包要有時間, 慢慢整先開心加麻, 日日整好似返工咁又唔係咁好玩喎.