二比一, 輸咗

June 7, 2014, Saturday

吓, 世界杯都未開鑼就有賽果.... (哈哈, 不過出post 時剛打完揭幕戰, 巴西對克羅地亞, 三比一巴西勝....巴西fans開心啦...不過四球都係巴西入, 第一球烏龍波, 嚇親好多人呀!)

哼哼, 不過我唔係講世界杯呀! 係投票今晚食咩野呀!

我又點會夠兩仔爺二比一吖, 輸的一定是我.  如果我夾硬一定要嬴, 都無話唔得嘅, 型爸話我永遠係至高無上, 我開心就得.   哈哈, 佢咁講我又點可以唔輸吖.

今日中午三個人一齊去按摩(都有幾個星期無去過啦), 返嚟前大家就投票今晚食咩野, 二比一話要打邊爐, 我話未買野無準備喎(千萬個唔想, 天氣咁熱, 唔好路啩).  型爸話使咩準備吖, 返到香港, 坐的士去街市, 買完再坐的士返屋企, 返去淨係洗野就得啦....唓, 都諗哂啦...

去牛肉檔買牛肉, 真係海鮮價.  靚牛肉(三百幾文一斤嗰的)無哂, 呢的係牛肩肉都要HK$240一斤....上次都只係一百九十幾.

花尾躉翅相比起就平的七文一兩

家裡仲有的汕頭買回來的牛筋丸....呢個真係好正, 爽口彈呀!

買了少許水魷牛栢頁, 仲有腐皮

湯底用豬骨濃湯寶加蘿蔔做湯底

調味就用蒜蓉辣椒頭抽加桂林辣椒醬

加埋三款菜, 三個人好夠食啦.....

哈, 食完先發覺林太Whatsapp我, 原來五點幾佢邀請我地一齊打邊爐, 不過當時我過緊關無留意, 跟著就忙去買野.

原來的靚牛肉係比林太買哂呀!  佢地今晚三個人, 我地又係三個人, 如果早的睇到咪一齊食囉....

真係唔止型爸同二公子, 林家都好鍾意大熱天時打邊爐架.