五號屋的部落: 5月 2015

2015年5月31日星期日

Pizza + KFC

May 17, 2015, Sunday

昨晚二公子想打邊爐, 我滿足佢. 佢話今天有朋友要嚟, 咁我問使唔使煮佢地飯, 佢話唔好咁辛苦啦, 我地叫 Pizza + KFC, 你同Daddy都一齊食啦.

哈哈, 呢兩樣都唔係我地鐘意食嘅, 但久唔久一次, 無所謂啦.

响PHD 叫咗兩個大pizza

其實兩個大pizza, 每人每款一件都唔少, 但後生仔唔夠啦.

跟著二公子同型爸出去KFC 買炸雞. (我地住得偏遠, KFC唔送呀)

買咗兩大桶, 一桶辣, 一桶唔辣, 再加雞翼

每人一碗飯

仲有葡撻肚寶.

我地八個人, 幾個後生仔都食唔哂. 最開心係Cindy, 唔使煮仲有炸雞食.

哈哈, 我對的炸雞真係無興趣, 的肉嚡到死, 我食咗兩啖都唔想食. 但係Loki就流哂口水....媽媽,你唔想食我幫係頂啦....

2015年5月30日星期六

May 17, 2015, Sunday

昨天落雨落不停, 我地行山組的成員, 個個都打定輸數, 今個星期無得行山...哈哈, 我就覺得唔需到咁灰啦, 或者明早唔落雨呢! 組長話星期日早上七時才決定.

早上七時,竟然無咩雨, 組長話八點出發, 大家在whatsapp 群組, 拍手叫好.

到八點換好哂衫竟然開始落毛毛雨. 組長話既然大家都醒哂, 一齊出發去南涌觀音廟, 如果到時落大雨, 咁我地一齊去食早餐啦.

哈哈, 去到觀音廟, 一的雨都無, 咁我地又可以行. 呢後段路程, 全部都係石屎路, 唔係山路, 好安全. 我地行山只係想運動吓, 唔會搏命架. 天色唔係咁好, 不過又另一番景致

用手機拍張全景.

假期落大雨, 宋伯士多都無開門呀!

的牛群又响同一地方聚集, 路上的牛屎地雷陣, 比大雨洗乾淨咗好多

行咗大約一個鐘, 開始落雨, 仲越落越大....仲有一百米左右先到松記. 我地有帶備雨傘, 但雨大到成身濕哂.

我地响松記避雨, 當時只係十點幾. 咁早又唔想食飯.

的雨大到幾誇張

落咗十幾分鐘, 開始停雨, 個天仲有的光.

大家商量, 由呢道去蘭桂騰芳, 行到宋伯士多, 再轉返松記食午飯. 叫松記地留定的海鮮.

其實我地只係由蘭桂騰芳打個圈返嚟, 整個路程只係二三十分鍾.

返到松記, 都只係十一點幾....大家心情好, 一齊早的食海鮮餐

清蒸蜆

果皮蒸泥鯭 (hk$13元一兩)....的肉好鮮甜呀....

清蒸本地蠔

一樣很鮮味

豆卜煙肉炒椰菜

豉油皇炒麵

蒸咗兩條黑海立(hk$17一兩), 非常鮮味....正呀!

呢餐無叫腩肉, 走地雞, 只叫海鮮, 加碟菜及炒麵, 埋單hk$800, 我地覺得幾抵食.

食完大家高高興興回程去....的水位低咗好多啦.

今日大家好開心, 天公做美, 比機會我地行咗三個幾鐘. 仲安排到有海鮮餐食. 雖然中段落咗場大雨濕哂身, 但我地唔怕, 因為就算唔落雨, 天氣咁熱, 我地行都行到出汗成身濕哂啦.

返到屋企, 下午又繼續落雨落到嘭嘭聲...

2015年5月29日星期五

係唔係都要打邊爐

May 16, 2015, Saturday

上星期日母親節型爸話想食打邊爐, 被我睩大眼睛無聲抗議, 唔打邊爐食西餐,結果係自己要做一餐.

二公子今日放假, 一早上十一點一齊去按摩, 早去早返, 三點幾開始返屋企. 回程途中, 二公子又提出要打邊爐, 話好耐無食過(又幾耐呀?) 我話Cindy煲咗湯, 明天先打啦, 二公子話明天有朋友嚟, 唔打就算啦.....對著老公可以硬的心腸, 但對著個仔就心軟, 打邊爐就打邊爐啦. 的湯留返明天啦.

屋企基本上都有的存貨, 只係出去買多少野就得啦.