緬甸涼拌豆卜

September 30, 2016, Friday

呢掛開始覺我Cindy個人返咗嚟, 個心都返埋嚟啦.   成日都好好笑容, 好開心咁.   每日做完工作洗好碗就係佢私人時間, 晚晚都响道"高歌", 哈哈, 真係高歌架, 佢唱到好大聲, 我地响廳睇電視, 佢關埋房門, 我地都聽得好清楚.   佢呢排仲話要學廣東話, 每日上網學呀!

Cindy心情好, 又會整的緬甸小食.   今次嘅涼拌豆卜入面有青瓜, 蝦米蓉, 紅蔥頭, 花生碎. 佢用個blender打碎的蝦米成蓉, 好肉的魚鬆豬肉鬆咁, 食落同蝦米碎又不一隸.  豆卜, 青爪都切成幼條.   再加埋檸檬汁及少少魚露, 好好味呢!

晚飯多了一碟前菜小食, 正呀!

雞翼, 一碟好普通的餸, 但二公子好有要求, 佢話要煎唔要焗.    對於我地煮餸嚟講, 梗係焗方便啦.  醃好放入焗爐就可以煮其他餸.  但二公子話佢要食煎雞翼, 的雞皮要脆的.   咁我唯有教Cindy用平底鑊唔落油慢火煎, 等雞皮的油出嚟煎的皮.  的皮就梗係好食啦.  

呢碟Cindy Style 的炆南瓜, 南瓜好甜好味, 但係的肉就好嚡啦.

呢排街市又平又靚的學斗, 即係白菜呀!  呢的又短又肥嘅白菜, 好味呀!

紅蘿蔔薯仔粟米芯煲雞穀.   呢的雞殼係我整無骨醉雞拆出嚟架.  真係慳家又無嘥.

 

呢四餸一湯都唔錯啦.