又嚟考吓我

September  26, 2014, Sunday

呢排日煮夜煮, 個雪櫃嘅物資都清到七七八八, 今日連雞蛋都無.

但係呢個二公子真係久唔久嚟考我.   明明同我講, 今晚的同學嚟玩戰棋, 晚餐唔使預佢地, 佢地自己攪掂.   但到食飯時間, 佢的朋友仔唔想叫外賣 (哼哼哼, 即係想食住家飯啦), 咁二公子話, 媽咪, 我地一齊喺到食晚飯.

吓, 仲有半個鐘, 即刻要諗加餸....

最快係蒸蛋炒蛋, 但屋企無蛋, 即時要去鄰居借蛋, 呀! 好彩仲有盒豆腐.

本來三餸一湯, 蒸魚, 蒸排骨, 腐乳炒西生菜加紅蘿蔔薯仔煲魚湯... 兩蒸一炒, 好輕鬆

現在加兩餸, 火腿炒蛋, 肉鬆皮蛋蒸豆腐, 變成五餸一湯.   哈哈, 考我啫, 難我唔到.

佢的朋友仔食得好開心, 可能係隔離飯香啦!

順便都要讚吓自己, 每個星期, 天天都食唔同嘅餸,有新鮮感, 無偷懶呀!

星期一放工返到屋企, 一樣係三餸一湯...

 
粟米煎魚餅

 
昨晚醃好, 今日返嚟焗豬肩胛

 
蒜蓉菜心炒秋葵

紫菜肉丸(自家製)蛋花湯

 
呢三餸一湯, 我都好滿意架.

Cindy仲係好慢, 我放工後繼續磨打手煮飯, 煮好食完等佢慢慢洗啦.