白菜肉丸菠菜刀削麵

September 29, 2014, Monday

唉, 今日做咗心理輔導員.

Cindy嚟咗我屋企都三個星期, 清潔工作已經上手, 如果當天唔使煮食, 佢空閒時間都頗多.

今晚型爸同客食飯, 只得我一個食, 就唔使煮幾餸一湯.   唔知係咪空閒時間多, 就會多野諗.    返到屋企, 見到Cindy眼濕濕, 我問佢咩野事, 佢話好掛著屋企的仔女.   唉, 離鄉別井去到人地個國家, 點會唔掛著屋企, 我去兩個星期旅行都掛著屋企啦.  初初係難過的, 但時間一久習慣了, 就會好過的.  

但預備嚟做女傭, 申請時應該己有心理準備要同家人分開.   離鄉別井目的都係想搵多的錢, 供仔女讀書, 令家人生活好的.   申請嚟時, 欠下agent的錢要還, 如果因為掛念而想離開, 咁搵唔到錢仲要欠下一大畢債.    我解釋比佢聽, 唔止緬傭, 香港仲有好多菲傭印傭, 個個都係離開家人嚟香港, 都係要搵錢.  香港的印傭越嚟越多, 好多嚟咗之後都唔想走, 因為返到家鄉都係要做但搵唔到錢.

講咗好耐, 佢話好好多, 仲多謝我添....不過最終知道, 佢電話咭的錢用哂, 打唔到返屋企.   又話想明天放假.    佢想放假比佢放無問題, 之前佢無錢, 我預支幾百文比佢買電話咭同百達通,  今日再預支多幾百比佢, 等佢明天放假, 想買咩就咩啦.

做完輔導主任, 晚餐都係自己煮比自己食.   問佢要唔要食麵, 佢話唔要, 咁我煮一人份量. 

煮碗麵好快啫.

呢款刀削麵喺759阿信屋買架.

 
用滾水煮幾煮都好快腍

再煮的白菜

有自家製的豬肉魚肉丸

話咁快就有得食.  時間關係, 諗著自己食唔使將的肉丸搓咁靚, 隨便用匙羹取起放落去焯熟, 整起又好似好醜樣咗的.

哈哈, 下次自己食都要整靚的先得.

Cindy唔食啫, 佢都要幫我洗碗.

希望佢明天放完假, 開開心心返嚟啦.