麻辣雞 + 椰汁飯

March 5, 2017, Sunday

二公子都唔知點解咁鍾意食辣雞煲, 又問我幾時整.   整辣雞煲就好易, 但我唔想食火鍋呢!   咁唔食火鍋都可以整麻辣雞用嚟做餸.

煮法都係同麻辣雞煲一樣, 只係唔落煲, 改用湯碗上.  我未影相佢兩仔爺已經開始食.

今次用咗一款新的麻辣火鍋醬嚟煮雞. 都幾好味喎.  呢樽麻辣醬上次咩野台灣節响一田買架.

今餐仲有肉碎玉子豆腐

炒菜心

青紅蘿蔔瘦肉湯

Cindy今日煮咗椰汁飯, 佢用椰子粉開水, 的飯入面加入乾蔥一齊煮, 又幾好味喎. 

 呢的椰子粉我响泰國買番嚟架. 哈哈, 每次去泰國都帶兩盒返嚟.  貪佢夠方便呀. 

三餸一湯好好味, 未影完大合照, 的雞已經無咗三份一....相機食完, 我都未開始食呀!