荔枝酒

July 1, 2014, Tuesday

有一種生果, 我從來都唔會買, 但每年都有得食.   見到想食, 但又唔敢食咁多.

呢的係咩, 就咪係荔枝囉.  我雖然係寒底, 但唔係好受得荔枝, 每次都只敢食幾粒, 跟著唔敢食啦, 會喉乾舌燥.

前兩天十八號部屋送給我差不多一斤荔枝, 放入雪櫃雪凍, 好好味呢.  但家裡只得我一人食, 二公子型爸都唔啱.  我怕燥熱, 每次只吃幾粒....啊, Loki都喜歡食, 我食咩佢都要我比的佢食.

哈哈, 昨晚型爸的朋友送來一大盒荔枝, 咁多, 點好呢!


 一盒唔知有幾多斤呢,

 
惠州企岭出產. 上網查吓, 呢道主要出桂味, 亦有糯米慈

  
 的荔枝放响個盒過夜我怕會爛, 漏夜都整好佢, 將的枝葉剪哂.

 
 試一粒, 好甜呀. 攞雪櫃的荔枝比拼吓, 睇落差唔多, 的核比昨天的大了一點點.

 
 外皮又有的不一樣.  我對荔枝一的認識都無, 真係唔識分咩野品種.

有咁多荔枝, 用嚟浸酒都好喎, 即刻上網查吓點浸好.

查到浸法有好多種, 有的純加糖發酵, 但我覺得唔似酒囉, 淨加糖, 似我地浸的酵素或果汁.

最後都決定用唔加糖的方法.

  
都有好多功夫做呀, 要先將荔枝連殼洗淨, 瀝乾再吹乾.  跟著慢慢剝殼

  
 剝殼就好快啫

 
但用木籤將的核挑出來, 呢個就花的時間.   其實可以連核一齊浸, 但我無足夠的闊口瓶.  挑咗的核, 稍為窄口的瓶都可以放將原個果肉塞入去.

  買了兩瓶桂花陳酒, 呢款酒只有12%.  一瓶750ml

 

 找了幾個whisky樽, 有兩個比較闊口, 可以放入去了核的荔枝

我用了大約一比一的份量, 320g 荔枝, 用了半瓶桂花陳酒(375 ml) .   的份量我都係自己決定


兩瓶原粒果肉

另外兩瓶瓶口太窄, 只可以將荔枝撕開一半再放入去, 然後再加酒


用桂花陳酒浸了4瓶.   桂花陳酒, 本身已有糖, 所以不需再加糖.

另外買了一酲三蒸酒, 5.2L.  我見有人用高樑酒來浸, 但高樑酒五十幾度, 太烈了, 退而求其次, 用三蒸, 三十七度算了.   都有想過買雙蒸, 但那麼多人用高度數的酒, 總有原因.

呢的全部都無去核, 用了大概是405g荔枝(去殼後, 未去殼前, 重量大概有500g吧), 500g 酒

每瓶都差不多, 共浸了4瓶.

沒有荔枝了, 仍有大約3L酒.  如果有人再送荔枝, 仍可以再浸.

有些人說浸三個月就可以, 有些人又話浸一兩年比較好.

到三個月時, 攞的嚟飲吓, 試吓味先.  的果肉咁甜, 我覺得荔枝酒唔需要落糖, 想像加了糖會好甜, 浸酒取其香而不是要浸甜酒.  跟梅酒好像有所不同.  如果到時太烈唔夠甜,  加蜜糖再浸都應該可以啩.

荔枝酒好似唔係咁多人浸, 可能無梅酒咁好味呀. 不過唔試又點知好唔好味呢!
---------------------------------------------------------------------------------------------------------
後記 - July 20, 2014

的酒浸咗二十日, 打開嚟聞吓, 用桂花陳浸的酒荔枝味好香.  反之, 用三蒸浸嘅就無咁香. 

用三蒸浸嘅有四瓶, 我將其中兩瓶, 加了135g 冰糖.   浸多一個月, 又睇吓點先.