鹽麴青瓜

July 1, 2014, Tuesday,

昨天放假, 同型爸二公子去國內行了一圈, 回程順便去按摩.   輕輕鬆鬆過咗一天.  平時工作壓力大, 連續假期, 心情真係輕鬆好多.

今天七一假期, 咁多人去示威, 我就無諗過用呢的形式表達訴求, 都係响屋企平平安安好的.

响屋企就整吓野食啦.

 

 上次豆豆媽咪送咗包鹽麴比我, 今日就用嚟整餸啦.

 
 呢排的青瓜真係好平, HK$6-8就有三條.   昨天用了一條整麻醬青瓜手撕雞, 今日用兩條整鹽麴青瓜.

鹽麴有鹽, 的青瓜會出水.  我會將的青瓜去了中間的籽, 應該會出少的水.

切好入盒

加了一湯匙半鹽麴

撈勻蓋好入雪櫃

 

食時從雪櫃取出.   的青瓜好爽脆, 同鹽麴的味好夾,  好味呀!   

呢的又平又好味嘅野, 真係要整多的嚟食呀!

我今次雪咗三四個小時, 睇吓, 都出咗好多水呀.  咁夾的青瓜出嚟時, 就梗係唔要的水啦.