京阪神和歌山自駕遊 - Day 3

Mar 1, 2015, Sunday

行程的第三天....

起身打開窗, 一望出去就係大海, 好舒服呀!   望出去就係白濱瞭望塔...可惜今日下雨, 灰濛濛, 呢個行程要取消啦.

哈哈, 好開心呀, 我地租著嘅房, 女士可以去二樓免費租一件靚靚浴衣, 可以著住去食早餐, 溫泉呀...成間酒店行來行去都得.

食早餐在酒店六樓.  呢道的早餐無咩好食, 不過都係咁意食的.   哈哈, 成間餐廳, 只有我同家姊件浴衣最靚, 其他女士都只係著房間入面, 同男士一樣的浴衣.

咁我地梗係周圍搵靚景影吓相啦.

十點幾我地出去遊玩啦.

第一景點, 千疊敷

唔知係因為落雨定係過咗旅遊旺貴, 星期日都無咩遊客.   我記得以前同型爸嚟過, 想影張相無其他遊客都幾難呀!

跟著去下一景點: 三段壁


呢道要比入場費, 每人yen1,300.  型爸問我仲入唔入, 嚟道就再入去啦, 都未同的仔嚟過.

呢個三段壁, 係咪有的似我地嘅張保仔洞(其實我都無去過張保仔洞)

跟著出到嚟就影吓相, 風影幾靚呀!

呢條鍊要影吓呀, 如果唔係落雨, 都唔知係要嚟從屋頂流的雨水落地下呀!

我地响呢道嘅手信店買咗好多手信, 佢地好識做生意, 比我地九五折再免稅, 慳咗十幾個巴仙呀!   我見的價錢真係同外面的標價一樣, 真係抵買呀!

跟著我地去咗Tore Tore魚市場.  我同型爸以前都嚟過, 不過當其時係跟旅行團.

全部都賣海產

頭先旅遊景點就冷清清, 但呢道就好多人, food court大排長龍.

四位男士去買野, 我同家姊就搵位....型爸買咗好多刺身, 仲有柚子酒

肥美的拖羅, 七千幾日元, 好抵呀!   相比起的吞拿就失色好多.

甜蝦, 油漬三文魚子

呢道只係一部份, 仲有的要等30-40分鐘呀!

咁去再叫著的熱野食著先.

 

 其餘嘅刺身有得攞啦.....

 

中咗招啦...又話的日本人唔會呃人, 呢道係十二隻海膽你信唔信.   咁多個檔口, 只有呢間有海膽賣, 型爸一次過幫佢買哂十二隻海膽, 七千幾yen, 開出嚟只有咁少... 真係比佢地搵甜呀!

好彩的鮑魚同螄蛤無問題...

呢份三文魚最主要買比家姊食...

呢餐我地食咗yen32,570, HK$2,200. 

食完無咩其他景點, 開車同圍行吓....跟著話不如去飲咖啡


以為呢道有咖啡飲, 點知係無架..

咁大公子二公子話要食雪糕, 又比我地發現呢樣幾有趣.

 

 我地買軟雪糕, 見佢地拎咗呢盒雪糕出嚟

  

 跟著開咗呢部機, 放盒雪糕入去

跟著變成軟雪糕唧出嚟, 真攪鬼呀!

落雨, 呢道附近又無咩景點, 我地就用GPS搵McDonald去飲咖啡....跟著去行街買鞋, 行藥房又買咗一大堆, 呢兩日買咗好多野呀!

晚餐我地返酒店, 因為包咗架.

同昨晚的好類似, 又係每款三份,  咁我地又可以食唔同嘅野.

 

其實都好豐富, 同昨晚嘅menu唔一樣.  不過我地今日先食咗咁多魚生, 呢餐就覺得無咩趣啦.

人就係咁架啦, 昨晚嚟時好肚餓, 覺得份晚餐好味又豐富, 但今日食得太多, 晚飯時都唔係好餓就覺得呢餐麻麻地啦.

姊夫仲話食得太多魚生, 唔再食魚生啦, 明天開廾去神戶, 我地去食神戶牛肉....吓, 去神戶, 唔响我地行程入面喎...好, 明天先算啦.

晚飯後, 我地休息了一個小時, 跟著又去浸溫泉啦....