餞別

Jun 12, 2015, Friday

有迎新就有餞別, 幫我做咗七年幾嘅秘書小姐, 今日要離開啦, 我真係好唔捨得佢呀!   一個本來唔係好鍾意小朋友嘅女仔, 生咗BB之後, 竟然要放棄工作, 全心全意去照顧BB.   放棄自己嘅事業去做全職媽媽真係唔容易呀.

一行五人去咗East Side Tavern食lunch餞別.

平時去East Side 通常都有位, 今日五個人保險的預早打去訂位, 點知去到竟然無留位(唔知係咪唔習慣有人訂位), 好彩在最入面仲有一張檯, 唔係就真係掃興呀!

今日的Set Lunch

湯同沙律只可揀一樣, 大家都選擇了沙律吧, 唔要湯...哈哈, 通常食一碟沙律都已經半飽啦.

主菜我地會share嚟食.

要了一份炸魚

兩份三文魚pizza, 兩份辣椒pizza

三款主菜大家都唔錯, 又開始食唔哂要勸食, 我地留起的pizza pack走啦.

每次都一樣嘅甜品, 我覺得好甜, 但佢地話都ok.

略為苦澀嘅咖啡都唔錯

迷你極甜品配埋杯有點苦澀嘅咖啡又ok喎.

 埋單時, 又係出動張Loyalty Card嘅時候, 我已經又兩張印滿, 唔知比唔比我一次用兩張.

哈哈, 嗰位侍應好好呀, 一次比我免兩份餐.  我地五個人, 佢當四個計, 再減一個餐, 即實收三個餐.   上次減一個只收HK$20 service charge.  今次減兩個餐只係收三個餐嘅加一, 即係HK$30.  抵呀!

今次五個人嚟, 佢又比三張咭我, 兩張印兩個印, 一張印一個 (佢地每張咭每次最多蓋兩個印), 加埋本身我仲有一張, 共有四張咭.   哈哈, 食多兩次, 跟著又有平價餐食啦.