早上同的行山組員飲完茶就返屋企. 落雨天懶洋洋, 連去按摩都唔想去郁, 本來諗著留喺屋企hea吓唔出去, 但Cindy話屋企no meat, no veggies, no egg....係喎, 今個星期未買餸喎! 事關昨天同奶奶飲完茶, 跟著去咗觀塘samples sales, shopping 咗一日(真係估唔到觀塘的工廠大廈咁多樓上鋪, 衫褲鞋襪, 靚牛肉都有), 未去買餸, 今日一定要去啦.
去咗上水街市行完一圈, 再出去外面的菜檔睇吓....點解檔檔都係賣冬瓜, 節瓜, 勝瓜, 茄子...平時的菜心, 芥蘭, 白菜, 學斗去哂邊? 連蕃茄都無, 薯仔都係濕嘅, 唔敢買啦, 買到返去容咩易發芽. 咦, 其中有一檔有油麥菜, HK$13一斤...吓, 咁貴嘅...
唉吔! 呢個幾星期日日係咁落雨, 的菜浸死哂無菜供應, 得的瓜咋.
結果買咗一斤水通菜同一個椰菜, 再買冬瓜茄子就走啦. 要轉埸呀, 呢的落雨時候, 要去超市買先得啦, 可以買西芹, 西生菜, 西蘭花, 超市的蕃茄薯仔都靚的, 貴的就貴的啦.
家庭主婦去買餸呢份工作都真係好粗重, 買一個星期嘅餸, 左騰右騰 (好彩有型爸接送), 都攪咗成三個鐘. 買完返到屋企都七點, 筋疲力盡.
Cindy已經煮緊飯, 佢唔使等我買的餸嚟煮(要等就真係天黑啦).
本來型爸話今晚想食牛扒(因為昨天去觀塘買咗幾塊靚牛扒), 但使唔使咁心急呀, 我地星期五先啱啱食完牛扒配焗釀蘑菇....objection! 清清地家常便飯咪好囉.
況且買完餸都好攰啦, 的牛扒又未拎出嚟解凍, 整西餐我要親自下廚, 下星期先啦.
沒有留言:
張貼留言