換證

July 28, 2015, Tuesday

我個回鄉証九月三日夠期, 要換證啦.    响網上預約時間, 今日11:00 - 12:00去旺角攞籌換証.

係咪選擇錯誤, 唔應該選擇嚟旺角中旅社換呢!  超多人, 無論排隊攞籌, 影印, 取証, 都好多人排緊隊.

換回鄉証一定要拍特定照片, 普通証件相唔接受, 一定要有檢測回執....結果就椼生咗多間影相檔口開响中旅社隔離.   我未行到入中旅社就問我, 影咗相未, HK$30, 有得揀相....我聽到有得揀相, 又好喎!  我知道上面的即影即有機, 一影就係咁, 無得揀亦無得退.

咁我就跟咗位小姐去影相, 行入條小巷(都唔知係咪應該叫小巷, 定係商埸), 入面十幾二十間都係幫人影相影印.....呢道做就咗好多人嘅飯碗.

佢地幫我影咗兩張, 比我揀1或2,  兩張都差唔多, 是但啦.  的相打哂燈影, 點都好過的自助快相.  佢話10分鐘後先有相攞, 跟著問我攞咗籌未, 我仲傻吓傻吓, 未呀....你仲唔快的去排隊, 有排等呀.   我以為網上預約11:00-12:00, 一去到就有籌, 原來係預約咗, 先可以去排隊攞籌(有的無網上預約, 嚟到已經無哂籌....有個女士帶女兒氣來氣喘話要攞籌, 點知無,  佢即刻唔知點好,  佢話今早六點已經落嚟(應該係由國內落嚟)...)  排呀排, 排咗大約35分鐘攞到籌啦, 171號, 要等50個.

呢個時候就可以慢慢去攞相都未遲.   其實應該一嚟到就排隊, 跟著先去影相, 咁時間就利用得好的.

真係估唔到咁快手, 等咗大約一小時就已經辦好(好多個counter一齊開), 8月12日或以後就可以取證.  本來可以用郵遞方式, 但要即時收咗我張回鄉咭, 咁梗係唔好, 突然要去國內做野咪唔得.   麻煩的都係到時取新證先退回限舊證啦.

初時以為要等好耐都唔敢約同事食晏, 咁十二點幾攪掂就whatsapp 麻煩鬼同慢麼麼啦.

  
約咗佢地去老北京, 哈哈, 我由旺角落尖沙咀, 搭地鐵好快啫, 十二點五十分去到, 一個客都未有.  都一點, 先始有客人嚟, 不過都只係十檯八檯客, 坐唔滿呀!

餐牌一的都無改過

 
我whastapp佢地問吓想加咩野餸....魚香肉絲, 好就呢樣啦.

一坐低就放低碟涼拌三絲

 
跟著就上埋碗熱湯(應該係啱啱滾起).   佢兩個已到寶勒巷, 上到嚟飲湯啱啱好.

跟著其他兩碟星期二拍定菜i式都嚟啦.    我有諗過, 如果我一個人嚟, 係味都比咁大碟呢?

 

加選菜式嚟啦, 明明叫魚香肉絲, 點解嚟咗茄子.   問個侍應, 佢話唔好意思係佢寫錯單.   咁算啦, 都係咁食啫.

跟著要水餃周鍋貼.   檯檯都叫二三十隻, 我地唔叫咁多啦, 費事食到撐著個胃.

每人要了一碗麵, 已經好夠.

埋單每位HK$50.

我都唔明, 呢道都幾抵食吖, 點解唔滿座呢!