海鮮站海鮮晚餐

August 1, 2015, Saturday night

剪完頭髮五點幾, 繼續我地的家庭樂.

型爸話既然嚟到香港仔，不如去海怡半島嘅Prada Outlet行吓啦。 咁上網查咗地址，跟著Google Ｍap去搵啦。兜來兜去，Google Map話到咗, 但我地都見唔Prada. 

 去到新海怡廣場, 呢道雖叫廣場, 其實係工廠大廈, 在大廈外牆已經見到一的名牌logo, 但唔見有Prada.

咁落車去問的保安員, 其中一個比張紙仔我, 另一個同我講, Prada唔喺呢道架...你地去海怡東商場啦.


哈哈, 呢張就係佢比我嘅紙仔, 佢地早有準備, 即係好多人都好似我地咁搵啦 (另外有一對年輕說普通話的亦在搵)

咁我地再上google map搵, 拉到呢張相, 原來Prada就喺海怡東街市隔離, 就在路邊, 但我地兜來兜去都見唔到.

開車兜咗三次, 今之見到海怡東商場, 我同二公子先落車去搵...原來海怡東商場後面就係海怡東街市, 街市隔離就係Prada.  不過因為修路, 呢邊全部封哂板, 我地圍著條馬路行根本就見唔到.  r哈哈, 亦都無想像過Prada開响街市隔離.

去到都六點幾, Prada有專人開門, 即時派張有號碼嘅紙仔...吓唔係要排隊吖麻...原來唔係, 我亦唔知點呢張紙仔有咩野用(聽聞好多國內同胞嚟買, 可能人多先要派籌排隊).   今日又或者呢個時間唔多人, 整間Prada入面只有十多二十人,  全店無寫係outlet, 亦無標明大減價打幾多折.  所有衫褲鞋襪手袋銀包都只有一個價錢, 如果平時無買開Prada產品, 根本就唔知減咗幾多.

睇咗個round, 搵唔到心頭好, 二公子本來想買銀包, 但佢話唔鍾意的款.  而我亦睇唔啱心水.  型爸本來好大期望想買鞋, 但睇唔啱款, 啱款嗰對有無碼.....逗留了一小時, 結果空手而回.

已經晚上七點幾又係晚飯時間, 我地對呢區唔熟, 都係返尖沙咀食飯...兩位大爺又話食韓燒...吓, 又嚟燒肉? 前晚在家食牛扒, 今早牛藏食燒牛肉, 晚上又嚟韓燒? 

哈哈, 世事就係咁, 當我地去到尖東泊車出嚟, 就改變主意.


見到海鮮站, 型爸話不如食海鮮啦.  唔好諗咁多, 對著就係海鮮站, 咁就海鮮站啦.

 

平時去海鮮站都只係食午餐, 自從佢地搬咗嚟新鋪, 都未嚟食過晚餐.

 
餐牌上標明午市同晚市價錢(有的相差一倍), 咁我問侍應唔同價錢, 份量是否一樣.  佢地話晚市價錢貴的份量就多的, 咁都算公道.

點菜之後送上蒜蓉包, 咦, 我地無叫喎, 原來佢地話送架.

黃金蝦, 午市HK$60, 有4隻蝦, 晚市HK$98, 有6隻蝦

 
蒜蓉粉絲蒸扇貝 HK$90

豉汁粉絲蒸大蟶子, HK$98

海鮮焗飯, 午市HK$50, 晚市HK$98, 大碟的

蒸斑頭腩, 午市HK$68, 晚市HK$105.  型爸為咗呢碟班頭腩, 仲要加碗白飯添.

籠仔蒸白菜, 午市晚市都係HK$48

埋單HK$547, 無加一, 三個人食咗四款海鮮, 一籠蒸菜加一碟焗飯, 我地覺得真係好抵食.

如果我地去流浮山, 鯉魚門, 又要買海鮮, 跟著去酒家又要比油料錢, 咁多野, 無兩千蚊落唔到樓.   海鮮站好似專為三人行而設, 的餸每款都係三件, 每人一年件啱啱好.

海鮮站都有的貴價海鮮, 如北海道長腳蟹, 法國麵包蟹...我覺得係急凍海鮮, 煮好入雪櫃, 全部都係凍食, 嘻嘻, 唔啱啦.

食完返屋企睇電視大結局.

今日我地一家三口家庭樂都好開心.   飲早茶, 睇戲, 食午飯, 剪頭髮, shopping, 食晚飯, 樣樣齊呀!    大公子, 雖然你喺加國, 媽媽都好掛著你呀!