藉口

August 9, 2015, Sunday Night

今日行完山覺得都幾攰, 隻腳傷咗唔夠力, 行完好攰, 淨係想攤抖吓, 敷個mask, 睇吓電視都幾爽... 點知呢個型爸又嚟啦...

型爸:林老闆話今晚食咩好喎
我： 好攰，唔想煮喎
型爸:唔想煮唔緊要，烚咪得囉
我： 昨天立秋，高溫三十六度幾喎, 今日都好熱，又打邊爐
型爸:組長送的野生松茸，要快的食，打邊爐食埋佢啦。

其實佢個心想打邊爐，十萬個藉口啦。咁打邊爐就打邊爐啦，叫埋林生一家，我提議叫埋組長一家，佢地送咁大盒松茸比我地。　

今次洗咗二十幾三十隻，洗擦乾淨，切片就得。

買咗一斤海蝦

組長做海產生意，唔食龍躉，今天改買脆肉鯇腩

腐竹水魷牛百頁

林老闆供應一公斤手切肥牛

我買了手打魚蛋，牛丸牛肉餅，都係林老闆從汕尾帶落嚟，好爽口架。人多，每款都要分兩碟。

仲有生菜，油麥菜，芫茜，娃娃菜, 不過唔記得買豆腐。

一個清湯鍋

一個重慶辣鍋

十個人一齊打邊爐，好熱鬧呢！　

呀，要提吓雀巢出咗西瓜汁，味道都ok喎。

食完飯又要拎的菠蘿西瓜出嚟食，騰來騰去，好忙呢！

型爸成日以為打邊爐唔使點煮，好昜啫。　係唔使煮呀，但都要洗洗切切，Cindy一個人點攪得掂。　淨係出去買野，去完街市去超市，都騰咗兩個幾鍾。 返到屋企又要即刻切菠蘿切西瓜，放入雪櫃，如果唔係邊有冰涼的飯後果。

食完又要幫手執拾，Cindy慢手慢腳，唔幫佢佢有排洗呀！

攪完一餐，好攰呀！　其實有時煮兩三個餸potluck仲容易的呀！