紅豆糭

June 12, 2016, Sunday

星期天本來是行山天, 但呢幾日不停下雨, 不適宜行山.

早上七點幾, 組長話落緊雨, 大家瞓多陣, 遲的再決定.    去到九點, 組長話九點半出發....唔係呀, 組長你做咩咁大癮呀!   哈哈, 我地大部份人都話休息一天啦.   最後, 組長, 副組長, 仲有一位男組員, 三個唔聽話, 走咗去行"落雨路".   到十點幾, 雨下得很大, 我地都為佢地擔心.   跟著無幾耐, 佢地發張照片嚟報平安, 佢地行短途, 一個多小時行完, 正在強記士多食燒賣腸粉....那我們便放心了.

下雨天唔想出行又唔想煮, 突然間醒起仲有兩隻林老闆送的糭, 可以用嚟做午餐, 快靚正.

呢兩隻糭長長型都幾大隻

打開糭葉, 咦, 紅豆糭, 唔通係甜糭....一聽到甜糉, 型爸即刻好失望.

再拆開, 又唔係喎, 入面有豬肉, 頭尾都有半個蛋黃, 係紅豆鹹肉糉.  整隻糭都只係糯米紅豆.

哈哈哈哈, 型爸同我講, 呢的唔係紅豆, 係花生嚟架, 紅豆邊有咁大粒?   吓, 咁細粒花生? 我咬開見到入面白色, 但一的花生味都無....型爸, 唔好玩啦....

好彩上次收起咗隻紅豆糭, 即刻挑粒紅豆出嚟比型爸睇, 紅豆入面係白色,  只不過那紅豆糭的紅豆好大粒啫.

平時多數用紅豆嚟煲甜粥, 整紅豆沙, 感覺上多用嚟做甜品.  但紅豆本身無味, 用嚟包鹹肉糭都幾好味喎.

哈哈, 都無諗過, 唔用綠豆, 用紅豆包都咁好味.

多謝林老闆, 下年再收到朋友包的糉, 記著同我地分享呀!