無骨海南雞飯

Jun 25, 2016, Saturday

五號屋可以好遷就人, 麻煩鬼話要整無骨醉豬手, 咁我咪拆哂的骨囉.    二公子唔鍾意食有骨嘅雞, 咁我又去哂的骨囉, 咁就無藉口唔食媽媽整嘅雞啦.

今晚我要整海南雞飯, 咁隻雞又要去骨啦.

其實海南雞咪同白切雞差唔多, 只不過用鹽搽勻坐雞, 跟著我會放薑蔥同香葉入雞肚內.

人地喜歡用浸雞法, 我就喜歡蒸, 蒸咗出嚟嘅雞汁, 就已經有香葉薑蔥嘅味道.  用嚟煮個油飯就very good 啦.

唔止呀! 仲將的雞油爆香, 放埋落的飯....咁唔健康....死未.

但食海南雞, 重要係個油飯, 唔落雞油, 咁即係假油飯啦.    呢道四杯米, 我用咗蒸雞嘅汁連雞油, 再加爆香了嘅雞油, 加少許鹽撈的米, 跟著用雞湯嚟煮....個油飯點會唔好食呀!

拆雞就係easy job, 只要知道方法, 唔使十分鐘就拆哂的骨.....嘻嘻, 只剩雞翼尖有骨.

型爸喜歡食薑蓉, 咁我就整咗一碗薑蓉, 一碗辣椒醬.

攪掂, 用嚟招呼的粗雀友....哈哈, 又係咁收likes啦.