麻辣雞

April 2, 2017, Sunday

自從二公子愛上麻辣雞煲之後, 佢就久唔久問幾時整麻辣雞煲.   阿仔叫到就梗係整架啦.  但我又唔想成日食火鍋, 咁就將麻辣雞煲變做餸咪得囉.

最近買豉油送咗一樽黃豆醬, 仲介紹咗幾款煮法, 如牛柳粒, 炆雞翼, 大醬湯.  我試過的醬嘅味道, 有的偏甜, 我覺得可以用嚟煮麻辣雞, 令到的味道更加豐富.

今次嘅麻辣雞就用咗黃豆醬同麻辣醬

買咗隻大大隻走地雞, 斬件, 用魚露, 老抽, 麻辣醬先醃

的雞油要留起

因為要用的雞油, 用嚟起鑊及炒菜

先將的雞爆香至表面熟, 盛起.

再爆香薑蔥蒜

再爆香的醬 (用了兩湯匙黃豆醬加兩湯匙麻辣醬)

再將雞回鑊爆炒, 加蓋煮大約五分鐘.   哈哈, 本來我話要用個鑄鐵鍋嚟煮, 但Cindy唔鐘意, 佢話太重, 用呢個不鏽鋼五層鑊好的.

自家屋企食, 唔用鑄鐵鍋就唔用啦. 煮好用湯碗上就算啦.

今次又好好味, 一大隻雞食到一嚿都無得剩 (雞翼尖除外).   型爸話下次買的雞扒返嚟, 加埋一齊落去煮, 啖啖肉無骨, 二公子仲食得開心呀!   哼哼, 咁又得啫....成本仲平的呀!

跟著再教Cindy煮個蕃茄煮滑蛋

用雞油炒咗個蝦醬通菜

仲有個蕃茄薯仔紅蘿蔔什魚湯

美味的三餸一湯.....全部掃清....