阿善素食

July 10, 2017, Monday

今日食宴時, 慢魔麼話想食清清地, 要減肥呀, 不如食素啦.   我地ok, Green Monday呀!

呢道附近, 最近就係阿善素食.   我地好耐無嚟啦, 前一排覺得佢地煮的野越嚟越唔似樣, 整整吓都唔想嚟食.

今日嚟到, 見到整間鋪光猛咗少少, 好似油過吓油.   午餐都係咁上下.   呢道食午餐可以免茶免加一, 但如果叫散餐要加一加茶錢就唔抵啦.

睇完有的難揀, 最終要了A, B, C, 餐

粉絲什菜煲, 的菜少咗好多.  最奇怪係好多水, 跟著又打茨, 感覺不太好.

蕃茄煮蛋, 又係少得可憐, 又打勁多茨.....唉.....

我地覺得呢碟涼瓜豆卜金錢片係最好.  但唔知點解的金錢片有的異味, 好似"叔"咗.

萬壽果(合掌瓜)伏神湯, 呢個幾好.

個餐HK$40係好平, 但我覺得呢道真係可以做得好的.   的菜唔值多少錢, 落多的菜等客人高興的, 又或者加多一兩文啦.   有汁的餸唔好打咁多茨.

好耐之前有客人要了齋滷味, 有異味要成碟換成其他.  今日的金錢片真係有異味, 我地無出聲, 換都唔知換咩, 淨係唔食的金錢片.  夏天真係要留意下的食物儲存.   的餸做得唔好, 食客走咗有排都唔返嚟呀. 

今日餐廳好靜, 整個食飯時間都有位, 無試過滿座.